...

Azərbaycanda bir vakant yerə üç işsiz iddialıdır

Biznes və iqtisadiyyat xəbərləri Materials 19 Mart 2012 19:38 (UTC +04:00)

Azərbaycan, Bakı, 19 mart /Trend, müxbir Ə.Həsənov/

Martın 1-nə olan vəziyyətə görə, Azərbaycanda rəsmi olaraq 38,7 min nəfər işsiz kimi qeydiyyatdan keçib, işsizlərin 42,8 faizi qadındır. Trend-in məlumatına görə, bu barədə bazar ertəsi Dövlət Statistika Komitəsinin hesabatında deyilir. Ölkədə bir vakant iş yerinə üç işsiz iddia edir.

2012-ci il martın 1-nə olan vəziyyətə görə, ölkənin məşğul əhalisinin sayı 4629 min nəfər təşkil edib. Bununla yanaşı, cari ilin yanvarında muzdla işləyənlərin sayı 1361,7 min nəfər olub. Onların 844,7 mini dövlət sektorunda, 517 min nəfəri isə özəl sektorda çalışır.

İstehsalat sahəsində muzdla çalışanların 21,4 faizi sənaye, 2,6 faizi hasilat, 6 faizi emal sənayesi, 6 faizi tikinti, 2,9 faizi kənd və meşə təsərrüfatı, balıqçılıq, 2,2 faizi elektrik enerjisinin istehsalı və paylanması, qaz və buxar sahəsində, 1,7 faizi su təchizatı, tullantıların təmizlənməsi və emalı sahələrində məşğuldur.

Xidmət sahəsinə gəlincə, bu sahədə çalışanların 24,6 faizi təhsil, 19,9 faizi topdan satış və pərakəndə ticarət, avtomobillərin, məişət avadanlıqlarının və şəxsi istifadədəki əşyaların təmiri, 9,7 faizi səhiyyə və sosial xidmətlər, 4,8 faizi nəqliyyat və anbar təsərrüfatı, 3,9 faizi istirahət, əyləncə və mədəniyyət, 3,2 faizi elmi və texniki fəaliyyət, 1,8 faizi rabitə, 1,6 faizi maliyyə və sığorta fəaliyyəti, 0,8 faizi daşınmaz əmlakla bağlı əməliyyatlar, 4,1 faizi dövlət idarəetməsi və müdafiə sahəsi, icbari təminat, 1,8 faizi inzibati və köməkçi xidmət göstərilməsi, 1,3 faizi turizm və ictimai iaşə xidməti, 1,1 faizi isə digər sahələrdə çalışır.

İşsizliyə görə müavinətin orta məbləği 205,3 manatdır.

Xəbər lenti

Xəbər lenti