Azərbaycan, Bakı, 21 may / Trend, müxbir Ə.Həsənov /
MDB ölkələrində maliyyə və iqtisadi vəziyyətlə bağlı məsələləri müzakirə etmək məqsədilə Azərbaycanın nümayəndə heyəti mayın 23-də Astanada keçiriləcək MDB ölkələri Maliyyə Nazirləri Şurasının altıncı sessiyasında iştirak edəcək. Trend-in məlumatına görə, bu barədə bazar ertəsi Azərbaycanın Maliyyə Nazirliyinin məlumatında deyilir. Azərbaycanın nümayəndə heyətinə maliyyə naziri Samir Şərifov başçılıq edəcək.
"Sessiyada həmçinin MDB-nin Maliyyə nazirlikləri arasında Anlaşma Memorandumunun reallaşdırılması üzrə fəaliyyət planı, cari qlobal qeyri-stabillik fonunda maliyyə riskləri və başqa məsələlər də müzakirə olunacaq", - məlumatda deyilir.
Habelə Birlik ölkələrinin maliyyə nazirləri əməkdaşlığın gələcək hədəflərini müəyyən edəcəklər.
Məlumatda deyildiyi kimi, Azərbaycanın nümayəndə heyəti mayın 22-24-də Qazaxıstan paytaxtında keçiriləcək beşinci Astana iqtisadi forumunun işində də iştirak edəcəklər.
Daimi fəaliyyət göstərən MDB ölkələri Maliyyə Nazirləri Şurası 2008-ci il oktyabrın 10-da üzv ölkələrin hökumət başçılarının qərarı ilə böhranla mübarizə üzrə vəziyyətlərin öyrənilməsi və tədbirlərin görülməsi üçün yaradılıb. Qurumun birinci iclası 2008-ci il oktyabrın 21-də keçirilib.