Azərbaycan, Bakı, 21 may / Trend, müxbir A.Axundov /
Azərbaycan Dövlət Gömrük Komitəsi (DGK) 2012-ci ilin yanvar-aprel aylarında 129 ölkə ilə həyata keçirilən xarici ticarət əməliyyatlarının nəticələrini açıqlayıb. Bu barədə bazar ertəsi Trend-ə DGK-dan məlumat verilib.
Ölkənin mal dövriyyəsinin ümumi həcmi 11,335 milyard dollar təşkil edib ki, bu da ötən ilin göstəricisini 5,72 faiz üstələyir.
Xarici ticarət əməliyyatlarında 5,531 milyard dollar həcmində müsbət saldo yaranıb.
Bu dövr ərzində xarici ticarət əməliyyatlarına 4763 hüquqi və fiziki şəxs cəlb edilib, onlardan 2638 nəfəri hüquqi, 2125 nəfəri isə fiziki şəxs olub.
2012-ci ilin ilk dörd ayında ixrac əməliyyatları 8,433 milyard dollar təşkil edib ki, bu da 2011-cu ilin analoji dövrü ilə müqayisədə 5,36 faiz çoxdur.
İxracatda dövlət sektorunun payı 8,033 milyard dollar (95,26 faiz), özəl sektorun payı isə 378 milyon dollar (4,48 faiz) təşkil edib. Fiziki şəxslərdə isə bu göstərici 21,76 milyon dollar (0,26 faiz) olub.
2012-ci ilin yanvar-aprel ayları ərzində idxal 2,902 milyon dollar təşkil edib ki, bu da 2011-ci ilin analoji dövrünə nisbətən 6,79 faiz çoxdur.
İdxal əməliyyatlarında dövlət sektorunun payı 636,4 milyon dollar (21,93 faiz), özəl sektorun payı 2,12 milyard dollar (73,05 faiz), fiziki şəxslərin payı isə 142,1 milyon dollar (4,9 faiz) təşkil edib.
2012-ci ilin yanvar-aprel aylarında Azərbaycandan 1177 növ məhsul ixrac edilib, ölkəyə isə 5089 növ məhsul gətirilib.
