Azərbaycan, Bakı, 23 noyabr /Trend, müxbir C.Nəsibova/
2012-ci ilin yanvar-oktyabr aylarında Azərbaycanda bütün maliyyə mənbələrindən iqtisadiyyatın və sosial sahələrin inkişafına 11 135,8 milyon manat sərmayə qoyulub ki, bu da ötən ilin analoji dövr göstəricisindən 26,8 faiz çoxdur. Trend-in məlumatına görə, bu barədə Dövlət Statistika Komitəsinin hesabatında deyilir.
Təmir-tikinti işlərinə qoyulan investisiyaların həcmi 27,3 faiz artaraq 6783,7 milyon manat olub ki, bu da investisiyaların ümumi həcminin 60,9 faizini təşkil edib. İstehsalat yönümlü tikinti obyektlərinə 5013,2 milyon manat, xidmətlər sahəsinə isə 6 122,6 milyon manat yönəldilib.
İnvestisiyaların ümumi həcmindən 78,9 faiz daxili investisiyaların payına düşür. Daxili investisiyaların böyük hissəsi (73,8 faiz) dövlət müəssisələrinə və təşkilatlara, yalnız 26,2 faizi özəl müəssisələrə qoyulub.
Büdcə vəsaitləri hesabına maliyyələşdirilən tikinti obyektlərinə bu il üçün nəzərdə tutulan 5933,9 milyon manatdan 4863,6 milyon manat investisiya yatırılıb.
Müəssisə və təşkilatların vəsaitləri hesabına əsas kapitala 4692,6 milyon manat (investisiyaların ümumi həcminin 42,1 faizi), bank kreditlərindən 569,7 milyon manat (5,1 faiz), büdcə vəsaitlərindən 5072,2 milyon manat (45,6 faiz), büdcədənkənar fondların vəsaitlərindən 436 milyon manat (3,9 faiz), əhalinin şəxsi vəsaitlərindən 314,9 milyon manat (2,8 faiz), digər vəsaitlərdən isə 50,4 milyon manat (0,5 faiz) sərmayə qoyulub.
Əsas kapitala qoyulan vəsaitlərin 25,8 faizi (2875,9 milyon manat) neft sektorunun inkişafına, o cümlədən 74,2 faizi (8259,9 milyon manat) qeyri-neft sahəsinə, o cümlədən 11,9 faizi (1324,9 milyon manat) qeyri-neft sənayesi sektoruna yönəldilib. Neft sektoruna kapital qoyuluşları 17,6 faiz, qeyri-neft sahəsinə isə 30,3 faiz artıb.
İnvestisiyaların 37,7 faizi sənaye sahəsi, 17,5 faizi nəqliyyat və anbar təsərrüfatı, 9,1 faizi daşınmaz əmlak üzrə əməliyyatların (onların 8,9 faizi mənzil tikintisinin payına düşür), 8,8 faizi dövlət idarəçiliyi, 5,5 faizi təhsil, 4,5 faizi kənd təsərrüfatı, 4,4 faizi istirahət, əyləncə və incəsənətin, 2,8 faizi tikinti, 2,2 faizi ticarət, 2,3 faizi rabitə və informasiya, 1,5 faizi səhiyyə, inzibati və yardımçı xidmətlərin göstərilməsinin, 1 faiz ictimai iaşə və turistlərin yerləşdirilməsi, 0,6 faiz isə maliyyə və sığorta fəaliyyətinin payına düşür.
