Azərbaycan, Bakı, 15 fevral /Trend, müxbir E.İsmayılov/
"Azərbaycan Dəmir Yolları" QSC ötən il ərzində 23,1 milyon ton yük daşıyıb. Trend-in məlumatına görə, bu barədə QSC-nin sədri Arif Əsgərovun "Respublika" qəzetində dərc edilən məqaləsində deyilir.
2011-ci ilin yekunları üzrə bu göstərici 22,1 milyon manat təşkil edib.
"Eyni zamanda, daxili daşımalar 5 milyon ton, ixrac 4 milyon ton, idxal 6,7 milyon ton, tranzit 7,6 milyon ton olub, ümumi yük dövriyyəsi isə 8,2 milyard ton kilometr təşkil edib", - məqalədə qeyd edilir.
2012-ci il ərzində QSC-nin stansiyalarından 13,9 milyon ton yük göndərilib. Bunlardan 9,1 milyon ton yük neft və neft məhsulları olub. Tranzit nefti isə 5 milyon ton təşkil edib.
Ötən il dəmiryol stansiyalarından 2,6 milyon nəfər sərnişin göndərilib. Dəmiryol üzrə sərnişin daşımaları isə 2,7 milyon nəfər təşkil edib.