Azərbaycan, Bakı, 11 mart /Trend, müxbir A.Axundov/
Azərbaycanlı iş adamları macarıstanlı və rumıniyalı həmkarları ilə görüşəcəklər. Bu barədə Trend-ə bazar ertəsi Azərbaycanda İxracın və İnvestisiyaların Təşviqi Fondundan (AZPROMO) daxil olunan məlumatda bildirliir.
Macarıstan Respublikasının kənd təsərrüfatının inkişafı üzrə dövlət katibi Gyula Budainin rəhbərliyi ilə Macarıstandan 10 şirkətin Azərbaycana səfəri gözlənilir. Səfər çərçivəsində Azərbaycanda İxracın və İnvestisiyaların Təşviqi Fondunun təşkilatçılığı ilə martın 13-də Azərbaycan-Macarıstan biznes forumu keçiriləcək. Görüşdə Macarıstan tərəfdən heyvandarlıq, quşçuluq, taxılçılıq, kənd təsərrüfatı avadanlığının istehsalı, kartof toxumu və viruslara davamlı kartofun istehsalı, yem istehsalı, süd istehsalı, biotexnoloji araşdırmalar, ətraf mühitin bərpası, informasiya-texnoloji sistemlər və digər sahələri təmsil edən şirkətlər iştirak edəcək.
Budainin başçılığı ilə nümayəndə heyətinin səfəri martın 11-dən 14-dək davam edəcək. Dövlət və özəl sektorun təmsilçilərinin də daxil olduğu nümayəndə heyəti Azərbaycan-Macarıstan hökumətlərarası komissiyasının kənd təsərrüfatı alt komitəsinin birinci görüşündə iştirak edəcək.
Bundan başqa, Rumıniya Deputatlar Palatasının sədri Valeriu Zqoneanın rəhbərlik etdiyi nümayəndə heyətinin Azərbaycana səfəri çərçivəsində İqtisadi İnkişaf Nazirliyinin dəstəyi və AZPROMO-nun təşkilatçılığı ilə martın 14-də Bakıda Azərbaycan-Rumıniya biznes forumu keçiriləcək.
Biznes foruma neft-qaz sənayesi, İKT, bankçılıq, sənaye avadanlığı, elektrik enerjisi istehsalı, yol-nəqliyyat infrastrukturu, mədən sənayesi, vakuum texnologiyaları, inşaat avadanlıqları istehsalı və digər sektorları təmsil edən rumıniyalı iş adamlarının qatılacağı gözlənilir.