Azərbaycan, Bakı, 10 aprel /Trend, müxbir A.Axundov/
Azərbaycan Mərkəzi Bankı (AMB) ipoteka kreditləşməsinin inkişafı üzrə dövlət proqramı üzərində işi başa çatdırır. Trend-in məlumatına görə, bunu çərşənbə günü jurnalistlərə AMB-nin idarə heyətinin sədri Elman Rüstəmov deyib.
"Yaxın günlərdə layihə bankın müvafiq komitəsində müzakirə olunacaq, bundan sonra layihə baxılması üçün hökumətə təqdim ediləcək", - Rüstəmov qeyd edib.
Onun sözlərinə görə, bu dövlət proqramının əsas məqsədləri ipoteka sxemini bazar prinsiplərinə uyğunlaşdırmaq, yığım ipoteka sistemini tətbiq etməkdir. Burada məqsəd insanların ipoteka kreditlərinin əldə edilməsi, kreditləşmənin şərtlərinin liberallaşdırılması üçün öz yığımlarından istifadə etmələridir.
Bununla belə, Rüstəmov parlament komitələri tərəfindən hazırlanan "Sosial ipoteka haqqında" ayrıca qanuna ehtiyac görmür.
Yığım ipoteka sisteminin tətbiqinə gəlincə, bu, daha əvvəl AMB-nin hazırladığı "Tikinti əmanət bankları haqqında" qanun layihəsi çərçivəsində nəzərdə tutulub. Lakin dünya bazarında baş verən maliyyə böhranı bu layihənin irəliləməsinə imkan vermədi, çünki bu sistemlər iqtisadi baxımdan etibarlı və bu tikinti əmanətlərinin əmanətçiləri üçün cəlbedici vəziyyətdə işə düşür. Yaradılan tikinti əmanət banklarının məğzi ondan ibarət olacaq ki, vətəndaşlar ipoteka kreditlərini əmanəti banka qoymaqla əldə edə biləcəklər. Bununla yanaşı, kreditin həcmi əmanətin məbləğini xeyli üstələyəcək.
"Kommersiya ipotekasının şərtləri bazarın tələblərinə uyğun formalaşdırılmalıdır", - AMB rəhbəri hesab edir.
