Azərbaycan, Bakı, 1 iyun /Trend, müxbir E. İsmayılov/
Heydər Əliyev Beynəlxalq Hava Limanının yeni aerovağzal binasının istismara verilmə tarixi avadanlığın çatdırılması və quraşdırılmasından asılı olacaq. Bu barədə şənbə günü Trend-ə "Azərbaycan Hava Yolları" QSC-nin vitse-prezidenti Etibar Hüseynov bildirib.
Onun sözlərinə görə, hazırda layihə çərçivəsində qızğın işlər aparılır və artıq ay ərzində aerovağzal binasının tikintisi üzrə əsas işlər başa çatdırılacaq: "Bu il sentyabrın sonunadək layihə çərçivəsində böyük həcmdə işin görülməsi planlaşdırılır. Fikrimcə, bu işin öhdəsindən gələcəyik".
Aeroportun yeni binasının istismara verilməsi tarixinə toxunan Hüseynov qeyd edib ki, bina gələn ilin yayınadək mütləq istismara veriləcək. Onun sözlərinə görə, işin gedişindən asılı olaraq, bu, daha əvvəl, yəni bu il də baş verə bilər: "Hər şey işin gedişindən asılıdır. Avadanlığın çatdırılması və quraşdırılması prosesi də təsir edir. Buna görə də hazırda tarix barədə danışmaq çətindir".
