Azərbaycan, Bakı, 22 iyul /Trend, müxbir E.İsmayılov/
2013-cü ilin yanvar-may aylarında Azərbaycana 3035 yük avtomobili idxal olunub ki, bu da ötən ilin analoji dövr göstəricisindən 16,4 faiz azdır. Bu barədə bazar ertəsi Trend-ə Dövlət Statistika Komitəsindən məlumat verilib.
Hesabat dövründə idxal olunan yük avtomobillərinin dəyəri 37,35 milyon dollar təşkil edib ki, bu da ötən ilin müvafiq dövr göstəricisindən 59 faiz azdır.
Ümümilikdə ötən il Azərbaycana 9432 ədəd yük avtomobili idxal olunub ki, bu da 2011-ci ilin göstəricisindən 52,7 faiz çoxdur. İdxal olunan yük avtomobillərinin ümumi dəyəri 213,4 milyon dollardan artıq olub. Bu, 2011-ci ilin müvafiq göstəricisindən 45,6 faiz çoxdur.
Həmçinin, 2013-cü ilin yanvar-may aylarında Azərbaycana 420 avtobus idxal olunub ki, bu da ötən ilin müvafiq dövrünün göstəricisindən 7,5 faiz azdır. İdxal olunan avtobusların ümumi dəyəri 19,73 milyon ABŞ dolları təşkil edib ki, bu da ötən ilin analoji dövr göstəricisindən 22,5 faiz azdır.
Ümümilikdə ötən il Azərbaycana 1038 ədəd avtobus gətirilib ki, bu da 2011-ci ildə qeydə alınan göstəricidən 58,5 faiz çoxdur. İdxal olunan avtobusların ümumi dəyəri 49,88 milyon dollar olub. Bu, 2011-ci ilin müvafiq göstəricisindən 88,1 faiz çoxdur.