Azərbaycan, Bakı, 8 may /Trend, müxbir E.Əliyev/
Azərbaycan Mərkəzi Bankının kreditləşmə sahəsi üzrə siyasətində dəyişiklik bazarın korporativ seqmentində rəqabəti gücləndirib. Bu barədə Trend-ə "PASHA Bank"ın İdarə Heyətinin sədri Fərid Axundov bildirib.
Ötən ilin sonlarında Azərbaycan Mərkəzi Bankı (AMB) ölkə banklarından istehlak kreditlərinin verilməsi üzərində nəzarətin sərtləşdirilməsini tələb edib. Tənzimləyici ölkədə fəaliyyət göstərən banklara borc götürənlərin iş yerlərindən arayışlar təqdim olunmadan kreditlərin verilməsini dayandırmağın tövsiyə edildiyi məktub göndərib. Bundan əlavə, avtomobillərin alınması üzrə kreditlərin verilməsi şərtləri də sərtləşdirilib ki, ekspertlərin fikrincə, bu, kreditləşmənin bu növü üzrə bank sektorunun portfelinin keyfiyyətini pisləşməsi ilə əlaqədardır.
Axundov deyib: "Biz artıq AMB-nin tələblərinin təsirini hiss edirik. Kreditlərin verilməsi zamanı bütün lazımi prosedurların icrasına nəzarətin sərtləşdirilməsi ilə yanaşı, tənzimçi real sektoru daha aktiv maliyyələşdirməyi məsləhət gördü. Nəticədə bu ilin əvvəlindən ötən vaxt ərzində bazarda vəziyyət dəyişdi: KOS kreditləşməsi sahəsində rəqabət gücləndi. Bir neçə bankın fəal çalışdığı korporativ seqmentdə də müştərilər uğrunda belə fəal mübarizə gedir. Bu, ümumilikdə bazarda korporativ müştərilərin sayının nisbətən az olması fonunda baş verir".
Bankın baş investisiya direktoru Taleh Kazımovun sözlərinə görə, "PASHA Bank"ın korporativ müştəri bazası 2013-cü ildə 42 faiz artaraq ötən ilin sonunda 838 müəssisə olub: "Kiçik və orta biznesə gəldikdə, ötən ilin yekunları üzrə bank KOS sektorundan 486 müştəriyə xidmət edib, bu seqment üzrə kredit portfeli isə 1,5 dəfədən çox artıb və 75 milyon manata çatıb".
