Azərbaycan, Bakı, 23 may /Trend, müxbir E.Əliyev/
Azərbaycan Gürcüstanın iri xarici ticarət tərəfdaşları arasında ikinci mövqeni qoruyur, lakin əmtəə dövriyyəsinin həcmi cüzi azalıb.
Trend-in məlumatına görə, Gürcüstan Milli Statistika Xidmətinin xarici ticarət haqqında hesabatına əsasən, cari ilin yanvar-aprel aylarında iki ölkə arasında əmtəə dövriyyəsi 391,98 milyon dollar olub. 2014-cü ilin ilk 4 ayı ərzində Gürcüstanın xarici ticarət dövriyyəsinin 11,4 faizi Azərbaycanın payına düşür.
Bununla belə, iki ölkə arasında xarici ticarət əməliyyatlarının həcmi il ərzində 1,4 faiz azalıb. Müqayisə üçün, ötən ilin yanvar-aprelində iki ölkə arasında əmtəə dövriyyəsi 397,54 milyon dollardan bir qədər çox olub.
Gürcüstanın ən iri ticarət tərəfdaşı Türkiyədir (520,14 milyon dollar). Siyahıda üçüncü yeri Rusiya (251,71 milyon dollar) tutur.
2014-cü ilin yanvar-aprel aylarında Gürcüstanın xarici ticarət dövriyyəsi 3,44 milyard dollar təşkil edib ki, bu da ötən ilin eyni dövrünün göstəricisini 14 faiz üstələyir.