Azərbaycan, Bakı, 18 mart /Trend, müxbir Emin Əliyev/
Azərbaycanın kənd təsərrüfatı məhsulları istehsalçıları ərəb ölkələrinin bazarlarına diqqət yetirməlidirlər. Trend-in məlumatına görə, bunu jurnalistlərə Azərbaycan xarici işlər nazirinin müavini, ölkənin Ümumdünya Ticarət Təşkilatına (ÜTT) üzv olması üzrə danışıqlar qrupunun rəhbəri Mahmud Məmməd-Quliyev deyib.
O bildirib ki, ÜTT təşkilata daxil olan digər ölkələrin bazarlarına sadələşdirilmiş çıxışdır: "Əgər qarşımıza qoyulan şərtlərin hamısını qəbul etsək, iqtisadiyyatın şaxələndirilməsi prosesi zərər görə bilər. Bunu etiraf etmək lazımdır, çünki daxili bazar açılacaq və ÜTT-nin digər üzv ölkələri şübhəsiz ki, bundan istifadə edəcəklər. Üzv olma prosesində kənd təsərrüfatı, xüsusilə subsidiyalar və kənd təsərrüfatı məhsullarının bəzi növlərinin idxalı üzrə ikitərəfli danışıqlarla bağlı digər problemlər mövcuddur. Biz yerli istehsalçıları qorumaq istəyirik, tərəfdaşlarımız isə bu növ məhsullar üzrə mövcud gömrük tariflərinin azaldılmasında təkid edirlər".
M.Məmməd-Quliyevin sözlərinə görə, təbii ki, Azərbaycan kifayət qədər yaxşı keyfiyyətli kənd təsərrüfatı məhsulları istehsal edir, lakin bazarları düzgün seçmək lazımdır: "Ölkə ÜTT-yə daxil olmaqla yeni bazarlara sadələşdirilmiş çıxış əldə edəcək. Eyni zamanda, əgər bu bazarlara təklif edilən məhsul müəyyən tələblərə uyğun gəlməsə, həmin məhsullar sadəcə olaraq ora buraxılmayacaq. Əlbəttə ki, Azərbaycan məhsullarının diskriminasiyası halı olarsa, onların aradan qaldırılması üçün ÜTT-nin xüsusi mexanizmlərindən istifadə etmək olar. Lakin Avropa bazarlarına qaçmaq barədə düşünmək deyil, yeni istiqamətlərə, məsələn, ərəb ölkələrinə diqqət yetirmək lazımdır. Bu ölkələr aqrar sahədə əməkdaşlığın inkişafında çox maraqlıdırlar, çünki onların demək olar ki, yararlı torpaq sahələri yoxdur: ərəb ölkələrində istehlak edilən kənd təsərrüfatı məhsullarının 90-95 faizə qədəri idxal edilir. Avropada vəziyyət tam əksinədir və Avropa bazarında Azərbaycan istehsalçısının öz yerini tapması xeyli çətin olacaq".
Ərəb bazarlarına gəlincə, nazir müavini qeyd edib ki, danışıqlar aparılır və maraq var: "Hesab edirəm ki, bu proseslər sürətləndirilməlidir, çünki regiona öz məhsullarını ixrac etmək istəyən digər ölkələr də var. Məsələn, Qətərin İtaliya ilə olan müqaviləsinə əsasən, ərəb ölkəsi kənd təsərrüfatı da daxil olmaqla İtaliyaya investisiya yatırmaqla məhsul alır. İtaliya isə həm zəruri investisiyalar, həm də öz istehsalçıları və malları üçün satış bazarı alır. Azərbaycan da bu yol və ola bilsin, müvafiq təcrübənin tətbiqi barədə düşünməlidir".
Qeyd edək ki, Azərbaycan 1997-ci ildən ÜTT-də müşahidəçi statusunda təmsil olunur. Azərbaycan 2004-cü ildən ÜTT-nin üzv ölkələri ilə danışıqlara başlayıb.