Azərbaycan, Bakı, 1 iyul /Trend, müxbir Emin Əliyev/
2014-cü ilin yanvar-may aylarında Gürcüstandan Azərbaycana diri çəkidə 6,09 min ton iribuynuzlu mal-qara ixrac edilib. Trend-in Gürcüstan Milli Statistika Xidmətinin hesabatına istinadən verdiyi xəbərə görə, bu ixracın məbləği 15,71 milyon dollar olub.
Məlumata əsasən, bu kateqoriyanın xüsusi çəkisi hesabat dövründə Gürcüstandan Azərbaycana ixracın ümumi həcminin 6,53 faizini təşkil edib.
2014-cü ilin yanvar-may aylarında iribuynuzlu mal-qaranın ixrac həcmi keçən ilin analoji dövrü ilə müqayisədə 6,69 faiz azalıb (say nisbətində 0,46 min ton). Müqayisə üçün: 2013-cü ilin ilk 5 ayında Gürcüstandan Azərbaycana 16,84 milyon dollar dəyərində 6,65 min ton (diri çəkidə) iribuynuzlu mal-qara ixrac edilib.
Ümumiyyətlə, hesabat dövründə Gürcüstandan Azərbaycana 240,42 milyon dollar məbləğində məhsul ixrac edilib. Ötən ilin eyni dövrünə nisbətən Azərbaycana ixracat 10,38 faiz azalıb. Müqayisə üçün, ötən ilin ilk 5 ayında Azərbaycana 268,26 milyon dollar dəyərində Gürcüstan malları ixrac edilib.