Azərbaycan, Bakı, 18 iyun /Trend, müxbir İlahə Məmmədli/
2014-cü ilin yanvar-iyul aylarında Azərbaycanın 134 ölkə ilə xarici ticarət dövriyyəsi 18,133 milyard dollar təşkil edib ki, bu da ötən ilin müvafiq dövrünün göstəricisindən 9,53 faiz azdır.
Trend-in Dövlət Gömrük Komitəsinin statistik hesabatına istinadən verdiyi məlumata görə, ilk 7 ayda Azərbaycan 13,25 milyard dollar həcmində ixrac əməliyyatı, 4,88 milyard dollar həcmində isə idxal əməliyyatı həyata keçirib.
Hesabat dövründə Azərbaycanın ixrac həcminin böyük hissəsi İtaliyanın payına düşüb. Belə ki, Azərbaycandan İtaliyaya 3,207 milyard dollar dəyərində mal ixrac edilib ki, bu da ixracın ümumi həcminin 23,13 faizini təşkil edir.
İxracda lider mövqeləri İndoneziya (12,55 faizlik xüsusi çəki ilə 1,66 milyard dollar), Almaniya (1,06 milyard dollar və ya 7,97 faiz), Fransa (0,909 milyon dollar və ya 6,86 faiz) və İsrail (0,778 milyon dollar və ya 5,87 faiz) tutur. Son iki ölkə iyulda mövqelərini dəyişiblər.
Bu ölkələrin Azərbaycanın ümumi ixracında payı 56,38 faizdir.
Cari ilin yanvar-iyul aylarında idxalın daha böyük həcmi üzrə ilk beşlikdə Rusiya (698,038 milyon dollar) liderlik edib. Azərbaycanın idxalının 14,29 faizi Rusiyanın payına düşür. Sonrakı yerləri Türkiyə - 690,594 milyon dollar (14,14 faiz), Almaniya - 378,123 milyon dollar (7,74 faiz), Çin - 370,899 milyon dollar (7,59 faiz), ABŞ - 369,133 milyon dollar (7,56 faiz) tutur. İyulda Almaniya və Çin ABŞ-ı qabaqlayıblar.
Bu ölkələrin Azərbaycanın ümumi idxalında xüsusi çəkisi 51,32 faizdir.
Bununla da Azərbaycanın əsas xarici ticarət tərəfdaşı 3,207 milyard dollarla İtaliya olaraq qalır ki, bu da ölkənin ticarət əməliyyatlarının ümumi həcminin 17,69 faizini təşkil edir. Sonrakı yerləri İndoneziya - 1,685 milyard dollar (9,29 faiz), Almaniya - 1,434 milyard dollar (7,9 faiz), Rusiya -1,082 milyard dollar (5,97 faiz) və Fransa - 0,997 milyard dollar (5,5 faiz) tutur.
Bu ölkələrin Azərbaycanın ümumi əmtəə dövriyyəsində payı 46,35 faiz təşkil edir.