Azərbaycan, Bakı, 12 sentyabr /Trend, müxbir Zülfiyyə Qurbanova/
Azərbaycan və Qırğızıstan əmtəə nomenklaturasının genişləndirilməsi və qarşılıqlı əmtəə dövriyyəsinin artırılması üzrə əlavə tədbirlərin qəbul edilməsi haqqında razılıq əldə edibıər. Trend-in məlumatına görə, bu barədə Bakıda keçirilmiş Azərbaycan-Qırğızıstan iqtisadi və humanitar əməkdaşlıq üzrə hökumətlərarası komissiyasının II birgə iclasının yekunları üzrə imzalanmış protokolun mətnində deyilir.
2013-cü ilin yekunu üzrə iki ölkə arasında xarici ticarətin ümumi həcmi 14,5 milyon dollar olub. Qırğızıstana 12,7 milyon dollarlıq mal ixrac olunub, 1,8 milyon dollarlıq idxal əməliyyatları həyata keçirilib.
2014-cü ilin yanvar-iyul aylarının yekunu üzrə iki ölkə arasında əmtəə dövriyyəsi 19,5 milyon dollar təşkil edib. Qırğızıstandan Azərbaycana 1,06 milyon dollar məbləğində məhsil idxal edilib, Qırğızıstana ixracat isə 18,48 milyon dollar səviyyəsində olub.
Komissiyanın iclasında qeyd edilib ki, əmtəə dövriyyəsinin indiki səviyyəsi ölkələrin real iqtisadi potensialına uyğun deyil. Protokolda vurğulanır ki, gələcəkdə qarşılıqlı iqtisadi fəaliyyətin genişləndirilməsi üçün iki ölkənin təsərrüfat subyektləri və sahibkarları arasında əməkdaşlığın aktivləşdirilməsi üzrə müvafiq səylər lazımdır.
Protokola əsasən, ticarət-iqtisadi əlaqələrin möhkəmləndirilməsinin vacib istiqaməti iki ölkənin işgüzar dairələri arasında birbaşa əlaqələrin inkişafı, birgə müəssisələrin yaradılmasıdır.
Bununla yanaşı, aqrar sənaye kompeksində əlaqələri genişləndirmək nəzərdə tutulur. Bu sahədə birgə əməkdaşlıq və qarşılıqlı məhsul tədarükləri həcminin artırılması üçün böyük ehtiyatlar var. Xüsusilə, Qırğızıstana neft-qaz hasilatı üzrə qazma aqreqatları üçün neft-mədən avadanlıqları və ehtiyat hissələrin tədarükü imkanı nəzərdən keçiriləcək, imzalanmış müqavilələrə uyğun olaraq, Qırğızıstana şəkər tozunun vaxtında tədarükü təmin ediləcək.
Komissiya hesab edir ki, iqtisadi əməkdaşlığın genişləndirilməsi iki ölkə arasında səmərəli nəqliyyat əlaqəsinin qurulmasından bilavasitə asılıdır. Tərəflər, həmçinin müqavilə-hüquq bazasının genişləndirilməsi haqqında razılıq əldə ediblər.
Yaxın vaxtlarda iki ölkə arasında ikiqat vergitutmanın aradan qaldırılması və gəlirlər və kapitala qarşı vergidən yayınmanın qarşısının alınması haqqında sazişin, Azərbaycanın Dövlət Sosial Müdafiə Fondu və Qırğızıstanın Sosial Fondu arasında icbari dövlət sosial sığorta sahəsində əməkdaşlıq haqqında protokol və digər sənədlərin imzalanması gözlənilir.
Bundan başqa, Azərbaycanın Rabitə və Yüksək Texnologiyalar Nazirliyi və Qırğızıstanın Nəqliyyat və Kommunikasiyalar Nazirliyi elektron hökumət sahəsində birgə əməkdaşlığın həyata keçirilməsi məsələsinə baxacaqlar, həmçinin "Azerspace"ın göstərdiyi xidmətlərdən istifadə imkanlarını öyrənəcəklər.