Azərbaycan, Bakı, 17 sentyabr /Trend, müxbir Ümid Niayeş/
İran və Azərbaycan müştərək investisiya komitəsi yaratmaq haqqında razılıq əldə ediblər. Trend-in IRNA agentliyinə istinadən verdiyi məlumata görə, bu razılıq İranda səfərdə olan Azərbaycanın iqtisadiyyat və sənaye naziri Şahin Mustafayev və İranın iqtisadiyyat naziri Əli Teyyubniyanın görüşü zamanı əldə edilib.
Görüşdə tərəflər iki ölkə arasında əlaqələrin hərtərəfli inkişaf etdirilməsinin əhəmiyyətini vurğulayıblar.
Ə.Teyyubniya deyib ki, İran və Azərbaycan arasında hazırkı 500 milyon dollarlıq ticarət mübadiləsi qane edici deyil: "İran tərəfi bu göstəricinin artırılmasıda qərarlıdır".
Nazir, həmçinin iranlı investorların Azərbaycanda infrastruktur, o cümlədən yollar, elektrik stansiyaları və bəndlərin yenilənməsi sahəsində sərmayə yatırmağa hazır olduqlarını vurğulayıb.
Ş.Mustafayev, öz növbəsində, iki qonşu dövlət arasında əlaqələrin genişləndirilməsinin əhəmiyyətini qeyd edib.
O, Ə.Teyyubniya və iranlı investorları ölkənin investisiya imkanları ilə tanış olmaq üçün Azərbaycana səfərə dəvət edib.
Qeyd edək ki, Ş.Mustafayevi İrana səfərində Naxçıvan Muxtar Respublikası Ali Məclisinin sədr müavini, həmçinin Xarici İşlər, Nəqliyyat və Fövqəladə Hallar nazirliklərinin, ARDNŞ və "Azərenerji" ASC-nin rəsmilərinin daxil olduğu nümayəndə heyəti müşayiət edir.
