Azərbaycan, Bakı, 26 sentyabr /Trend, müxbir Azad Həsənli/
2014-cü ilin yanvar-avqust aylarında Gürcüstandan Azərbaycana 22,79 milyon dollar dəyərində 8,98 min ton diri çəkidə iribuynuzlu mal-qara idxal edilib. Trend-in məlumatına görə, bu barədə Gürcüstan Milli Statistika Xidmətinin cari ilin 8 ayının yekunlarına dair hesabatında deyilir.
Hesabat dövründə bu sahənin xüsusi çəkisi Gürcüstandan Azərbaycana ixracın ümumi həcminin 6,02 faizini təşkil edib.
Ötən ilin eyni dövrü ilə müqayisədə Gürcüstandan Azərbaycana iribuynuzlu mal-qaranın idxal həcmi 26,3 faiz, say etibarilə isə 3,12 min ton (25,8 faiz) azalıb. Müqayisə üçün: 2013-cü ilin yanvar-avqustunda Gürcüstandan Azərbaycana 30,94 milyon dollar dəyərində 12,1 min ton diri çəkidə iribuynuzlu mal-qara idxal edilmişdi.
Qeyd edək ki, bu ilin yanvar-avqust aylarında Gürcüstandan Azərbaycana 378,1 milyon dollar dəyərində məhsul ixrac edilib. İl ərzində Gürcüstandan Azərbaycana ixrac 19,2 faiz azalıb. Müqayisə üçün: 2013-cü ilin yanvar-avqustunda Azərbaycana 467,81 milyon dollar dəyərində Gürcüstan malları ixrac edilib.
