Azərbaycan, Bakı, 2 oktyabr /Trend, müxbir Azad Həsənli/
Azərbaycanda vergi ödəyicilərinə xidmət üzrə mərkəzlərin ümumi sayının 55-dək artırılması planlaşdırılır. Bunu cümə axşamı Trend-ə Vergilər Nazirliyinin Vergi ödəyicilərinə xidmət idarəsinin rəisi Elçin Məmmədov deyib.
Onun sözlərinə görə, hazırda Azərbaycanda 41 belə mərkəz fəaliyyət göstərir: "Onlardan 4-üBakıda , qalanları isə regionlarda fəaliyyət göstərir".
"Azərbaycan Respublikasında vergi inzibatçılığının təkmilləşdirilməsi Dövlət Proqramı (2005-2007-ci illər)"na əsasən, ölkədə vergilərin könüllü ödənilməsi sisteminin inkişaf etdirilməsi, əlverişli biznes mühitinin formalaşdırılması,vergi ödəyiciləri ilə vergi orqanları arasında münasibətləri daha da təkmilləşdirmək məqsədilə vergi ödəyiciləri üçün xidmət mərkəzlərinin yaradılması nəzərdə tutulub.
Bu məqsədlə 2007-ci ildən Vergilər Nazirliyi tərəfindən regionlarda, xüsusən vergi orqanı olmayan iri şəhər və rayonlarda xidmət mərkəzlərinin qurulacağı yerlər müəyyən edilmiş, müasir kompüter və kompüter avadanlıqları, sürətli kommunikasiya sistemi ilə, zəruri mebel və avadanlıqlarla təchiz edilmiş xidmət mərkəzlərinin tikintisinə başlanılıb.
Xidmət mərkəzlərinin əsas məqsədi həmin regionda fəaliyyət göstərən vergi ödəyicilərinə müasir standartlara uyğun vergi xidmətlərinin göstərilməsidir.
Buraya daxildir:
- vergi qanunvericiliyinin tətbiqi barədə məlumat və izahatların verilməsi;
- vergi bəyannamələri ilə bağlı xidmətlərin göstərilməsi;
- vergi bəyannamələrinin elektron formada düzgün tərtib edilməsi və göndərilməsi (elektron daşıyıcısında) barədə izahatların verilməsi;
- vergi ödəyicisi ilə vergi orqanı arasında elektron sənəd mübadiləsinin aparılmasına dair xidmətlərin göstərilməsi;
- vergi ödəyicilərinin büdcəyə olan borclarınin öyrənilməsi, onlara öz şəxsi vərəqəsinə baxış imkanının yaradılması;
- vergi ödəyiciləri üçün vergi qanunvericiliyinin tətbiqi prosesində qarşıya çıxan cari məsələlər barədə treninqlərin keçirilməsi.
