Azərbaycan, Bakı, 24 noyabr /Trend, müxbir Azad Həsənli/
Gürcüstan il ərzində Azərbaycan istehsallı tikinti materiallarının idxal həcmini 24,07 faiz artırıb. Trend-in məlumatına görə, bu barədə Gürcüstan Milli Statistika Xidmətinin 2014-cü ilin yanvar-oktyabr aylarının yekunu üzrə xarici ticarət haqqında hesabatında deyilir.
Hesabata əsasən, 2014-cü ilin yanvar-oktyabr aylarında Gürcüstan Azərbaycandan 21,134 milyon dollar dəyərində 123,3 min ton inşaat gipsi və digər anhidritlər alıb ki, bu da ötən ilin analoji dövründəkindən 17,32 faiz çoxdur. Müqayisə üçün: ötən ilin yanvar-oktyabr aylarında Gürcüstana 18,02 milyon dollar məbləğində 99,377 min ton tikinti materialı idxal edilib.
Bu ilin ilk 10 ayında Azərbaycana 14,359 milyon dollar dəyərində 195,7 min ton sement ixrac olunub. Ötən ilin ilk 10 ayında isə Gürcüstandan Azərbaycana 27,968 milyon dollar dəyərində 379,09 min ton sement ixrac olunmuşdu.
Hesabat dövründə Gürcüstandan Azərbaycana 50,98 milyon dollar dəyərində 82,33 min ton dəmir çubuq ixrac olunub. Ötən ilin eyni dövründə Azərbaycana 33,65 milyon dollar dəyərində 53,74 min ton dəmir çubuq ixrac olunmuşdu.
Hesabat dövründə Gürcüstana Azərbaycan ixracının ümumi həcmində tikinti materiallarının xüsusi çəkisi 4,15 faiz olub.
Bu ilin yanvar-oktyabr aylarında Gürcüstan Azərbaycandan 509,36 milyon dollar dəyərində mal idxal edib. Ötən ilin eyni dövrünə nisbətən Azərbaycandan Gürcüstana idxal 3,9 faiz artıb. Müqayisə üçün: 2013-cü ilin yanvar-oktyabr aylarında Gürcüstan 490,27 milyon dollar dəyərində Azərbaycan məhsulları idxal edib.
Azərbaycan Gürcüstanın məhsul idxal etdiyi ölkələr sırasında üçüncüdür, Gürcüstana gətirilən məhsulların ümumi həcmində Azərbaycandan ixracın xüsusi çəkisi 7,3 faiz təşkil edir.
