Bakı. Trend:
Noyabrın 20-də "Bakı Beynəlxalq Dəniz Ticarət Limanı" QSC-nin baş direktoru Taleh Ziyadov Ukraynanın Azərbaycandakı fövqəladə və səlahiyyətli səfiri Aleksey Mişenkonun rəhbərlik etdiyi nümayəndə heyətini qəbul edib.
QSC-dən Trend-ə verilən məlumata görə, görüşdə səfirlə yanaşı, səfirliyin İqtisadiyyat departamentinin əməkdaşları, Ukraynanın "UKRFerri" gəmiçilik şirkətinin direktoru, "Ferri-Trans-Servis" şirkətinin, o cümlədən "Gürcüstan Dəmir Yolları" ASC-nin nümayəndələri iştirak ediblər.
Görüş çərçivəsində qonaqlar Bakının Qaradağ rayonun Ələt qəsəbəsində tikilməkdə olan yeni Bakı Limanı ilə tanış olub, Limanın ölkə və regionun iqtisadiyyatına verəcəyi töhfələr ətrafında müzakirələr aparıb və Limanın inkişaf strategiyası haqqında məlumat əldə ediblər. Bununla yanaşı, qonaqlara Ələtdə yerləşən Bakı Limanının Şərqdən Qərbə və Şimaldan Cənuba gedən iki çox mühüm nəqliyyat dəhlizinin kəsişməsində yerləşməklə tarixi İpək Yolunun canlanmasında oynayacağı roldan bəhs edilib, Limanın tikinti fazaları haqqında ətraflı məlumat verilib və qonaqların suallarını cavablandırılıb.
Müzakirələr çərçivəsində Ukrayna şirkətləri və limanlarının Beynəlxalq Transxəzər Nəqliyyat Marşrutuna qoşulması ideyası ətrafında fikir mübadiləsi aparılıb.
Qeyd edək ki, Azərbaycan Respublikası Prezidenti cənab İlham Əliyevin 18 mart 2015-ci il tarixli sərəncamı ilə "Bakı Beynəlxalq Dəniz Ticarət Limanı" Qapalı Səhmdar Cəmiyyətinin yaradılıb. Hazırda Bakı Limanının Avrasiyada nəqliyyat və logistika mərkəzinə çevrilməsi istqamətində beynəlxalq standartlara əsaslanan işlər görülür. Xəzər dənizində ən böyük liman olan Bakı Limanının Qaradağ rayonunun Ələt qəsəbəsində tikilməkdə olan yeni kompleksinin hər üç tikinti fazası bitdikdən sonra yükaşırma qabiliyyətinin 25 milyon ton olması nəzərdə tutulur.
Trend-in ən mühüm və maraqlı xəbərlərini "Telegram"da izləyin
.jpg)
.jpg)
.jpg)
