Bakı. Trend:
Gürcüstandan Azərbaycana iribuynuzlu və xırdabuynuzlu heyvanların gətirilməsinə qadağa qoyulub. Bu barədə Trend Kənd Təsərrüfatı Nazirliyinə istinadən məlumat verir.
Ümumdünya Heyvan Sağlamlığı Təşkilatının (BEB) 2016-cı il 8 fevral tarixli məlumatına əsasən, Gürcüstanın Tbilisi şəhəri yaxınlığında yerləşən Varketili ərazisində xırdabuynuzlu heyvanlar arasında taun xəstəliyi qeydə alınıb.
Azərbaycan ərazisinin başqa dövlətlərdən keçə biləcək yoluxucu və ekzotik xəstəliklərdən qorunması məqsədilə taun xəsətəliyinin qeydə alındığı Gürcüstanın Varketili ərazisindən və risk zonasına daxil olan ərazilərdən diri iribuynuzlu və xırdabuynuzlu heyvanların idxalına müvəqqəti məhdudiyyət qoyulmasına zərurət yaranıb. Bununla əlaqədar, "Baytarlıq haqqında" Azərbaycan Respublikası Qanununun 8.1.7-ci maddəsinə əsasən Kənd Təsərrüfatı Nazirliyi yanında Dövlət Baytarlıq Nəzarəti Xidmətinin 2016-cı il 11 fevral tarixli 4 nömrəli əmrinə uyğun olaraq Gürcüstanın Varketili ərazisindən və risk zonasına daxil olan ərazilərdən diri iribuynuzlu və xırdabuynuzlu heyvanların idxalına müvəqqəti məhdudiyyət qoyulub.
Bununla əlaqədar Kənd Təsərrüfatı Nazirliyi tərəfindən taun xəstəliyinin ölkəmizin ərazisinə keçməsinin qarşısını almaq məqsədilə zəruri tədbirlərin görülməsi üçün "Baytarlıq haqqında" qanuna uyğun olaraq müvafiq tədbirlərin görülməsi üçün Dövlət Gömrük Komitəsinə müraciət olunub.