Qəti sülh əldə edilməyənədək Azərbaycan Dünya Ticarət Təşkilatı (DTT) çərçivəsində Ermənistanla əməkdaşlıq etməyəcək.Bu barədə Trend ə AR xarici işlər nazirinin müavini Mahmud Məmmədquliyev bəyan edib.
Onun sözlərinə görə, bu, DTT-nin əsasnaməsinə zidd deyil.Həmçinin Ermənistan təşkilata daxil olmaq üçün Azərbaycana mane olmamağa dair öz üzərinə öhdəlik götürüb.
Nazir müavininin sözlərinə görə, hələ DTT ilə danışıqlar başlananda Azərbaycan ona nail oldu ki, təşkilat rəhbərliyi Ermənistan qarşısında belə bir öhdəlik qoydu və Ermənistanın xarici işlər naziri həmin ölkənin götürdüyü bu öhdəliyi rəsmi olaraq təsdiq etdi.
Diplomatın sözlərinə görə, Ermənistan təşkilata 2001-ci ildə daxil olub.Ermənistanın Azərbaycanı qabaqlamağını nazir müavini onunla izah edir ki, Ermənistan təşkilata daha tez ( 1993-cü ildə) müraciət etmişdi və müəyyən güzəştlərlə təşkilata qəbul edilmişdi.
Amma bu gün iqtisadiyyatı kifayət qədər zəif olan ölkə müəyyən problemlərlə qarşılaşıb və öhdəlikləri yerinə yetirə bilmir.Bununla bağlı olaraq Ermənistan rəhbərliyi DTT-yə həmin öhdəlikləri yumşaltmaq xahişi ilə müraciət edib.