Azərbaycan dövlət əmlakının idarə edilməsi üzrə Dövlət komitəsinin (DƏİDK) prezident İlham Əliyevin fərmanı ilə təsdiq edilmiş əsasnaməsi bu gün qüvvəyə minib. Bu barədə fərman noyabrın 16-da imzalanmışdı.
Trend bildirir ki, əsasnaməyə əsasən, Respublika hərrac mərkəzi, əmlakın inventarizasiya Bürosu, müəssisələrin və ticarət obyektlərinin, xidmət və istehsal fəaliyyətini əlaqələndirmə Mərkəzi, iqtisadi inkişaf nazirliyinin rayon və şəhər şöbələri ( regional inkişaf şöbəsi istisna edilməklə), Mülkiyyət qəzetinin təsisçi hüququ DƏİDK-nin tabeliyində qalır. DƏİDK sədrinin ölkə prezidenti tərəfindən təyin və azad edilən bir müavini olacaq.
DƏİDK-yə təqdim edilmiş şəhadətnamələr əsasında hüquqi şəxslərin əmlak hüququnun tərtibi və dövlət qeydiyyatı aparılacaq. Dövlət komitəsinin razılığı ilə fiziki yaxud hüquqi şəxslərə dövlət əmlakı və obyektləri icarəyə və istifadəyə verilir. DƏİDK nizamnamə kapitalında dövlət payının 20% təşkil etdiyi müəssisələrin nizamnaməsinin təsdiqinə icazə verir.
Dövlət Komitəsi Azərbaycan prezidenti İlham Əliyevin sərəncamı ilə 2005-ci il sentyabrın 16-da yaradılıb. Komitənin İqtisadi inkişaf nazirliyinin dövlət əmlakının idarə edilməsi və özəlləşdirilməsi Departamentinin bazasında yaradılması dövlət əmlakının idarə edilməsinin təkmilləşdirilməsi, özəlləşdirmədə şəffaflığın təmin edilməsi, əlavə investisiyaların gəlb edilməsi və s. kimi sahələrdə dövlət siyasətinin gerçəkləşdirilməsinin məqsədəuyğunluğu ilə əsaslandırılır. Həmin vaxt komitənin sədri Departamentin keçmiş direktoru Kərəm Həsənov təyin edilmişdi.