Avropa Yenidənqurma və İnkişaf Bankı (AYİB) martın 29-da Bakı-Samur (Rusiya sərhədi) avtomobil magistralının bir hissəsinin yenidən qurulması layihəsi çərçivəsində təsnifatqabağı tender elan edib. Trend bildirir ki, bu barədə AYİB-in məlumatında deyilir.Tenderin yekunları bu ilin mayın 20-dək aparılacaq. Layihənin gerçəkləşdirilməsi AYİB-in təqdim etdiyi kredit çərçivəsində həyata keçiriləcək.
AYİB-in sənədində qeyd olunur ki, bütün arzu edən şirkətlər tenderdə iştiraka dəvət olunur. Müqavilələr bankın kredit prosedurasına əsasən maliyyələşdiriləcək. İşlər iki lot - yolun 28-64 kilometrliyi və 64 - 89 kilometrliyi üzrə aparılacaq. İlk lotda 16 mövcud körpünün reabilitasiyası və iki yeni körpünün inşası nəzərdə tutulur. Bundan başqa, tenderin qalibləri dörd zolaqlı avtomobil magistralının yenidənqurmasını həyata keçirməli olacaq. İkinci lot yolun daha iki zolağı da əlavə edilməklə üç körpünün reabilitasiyası və beş yeni körpünün inşasını əhatə edir.
Avtomobil magistralının yenidən qurulması layişəsinin gerçəkləşdirilməsi üçün vəsaiti AYİB və Çexiya "Eksimbank" ayırır. AYİB-in kreditinin məbləği $100 mln. təşkil edir. Bu kreditlər dövlət zəmanəti ilə standart şərtlər əsasında ayrılır. Bu vəsaitlər yolun 28 -89 km.-nin yenidənqurmasına sərf olunacaq. Ümumi uzunluğu 208 km olan yolun qalan hissəsi Çexiya "Eksimbank"ın vəsaiti hesabına yenidən qurulacaq. Bank $180 mln. məbləğində kredit təqdim edir. Çexiya bankının krediti sindikatlaşdırılıb. Vəsaitin ümumi həcmindən $102 mln. "Eksimbank" və $78 mln. isə Fransanın BNP Paribas bankı tərəfindən təqdim olunub. Kredit 4 illik güzəşt və Libor+0,6% faiz dərəcəsi ilə 15 il müddətinə ayrılıb.