Trend agentliyinin məlumatına əsasən, Azərbaycan Sığorta Cəmiyyətləri İttifaqının aprelin 12-də keçirilmiş iclasında sığorta edənlərlə sığorta olunanlar arasında məhkəmə çəkişmələrinin sayının azaldılması üçün münsiflər məhkəməsinin yaradılması təklif olunub. Belə bir təcrübə xarici ölkələrdə, xüsusilə Fransada mövcuddur ki, burada işlərin 40 faizi məhkəməyə çatmamış həll olunur.
Bu, ictimai qurum, yəni sığorta şirkətləri və müstəqil ekspertlərin təmsil olunduğu məhkəməyəqədər orqan ola bilər. Sığorta bazarında münsiflər məhkəməsinin yaradılması haqqında qərar qəbul edildikdə, ilk növbədə başqa ölkələrin təcrübəsinin öyrənilməsi lazım gələcək. Elə hesab olunur ki, bu ideya iki sığorta şirkətinin birləşməsindən sonra gerçəkləşə bilər.
İdarə heyətinin iclasında ikinci rüb üzrə gəlirlərin smetası təsdiqlənib ki, bu, sığorta şirkətlərinin üzvlük haqlarından ibarətdir. Üzvlük haqları ötən il toplanmış vəsaitlərdən asılı olaraq hər şirkət üçün ayrı-ayrılıqda müəyyənləşdirilir.
Bu il İttifaqın başqa gəlirləri də ola bilər. Belə ki, iclasda bank işçiləri üçün sığortaya dair treninqlərin keçirilməsi haqda razılıq əldə olunub. Adətən onlar kreditlərin rəsmiləşdirilməsi zamanı risklərin sığortalanması ilə qarşılaşırlar.
Gündəlikdə olan digər məsələ 2005-ci il fəaliyytinin yekunları üzrə hesabat konfransının keçirilməsi idi. Konfrans may ayında keçiriləcək, lakin onun tarixi iclasda dəqiqləşdirilməyib.
