Dünya Bankının (DB) Bakı ofisinin meneceri vəzifəsini müvəqqəti icra edən Səidə Bağırovanın Trend agentliyinə bildirdiyinə görə, gələn həftənin sonuna qədər Dünya Bankının (DB) Cənubi Qafqaz üzrə aparıcı iqtisadçısı Kristian Pitersenin Azərbaycana səfər müddəti uzadılıb.
Onun səfəri bu gün sona çatmalı idi. Müddətinin uzadılmasının səbəbi hüquq-mühafizə sistemində islahatlar, səhiyyə islahatları və kənd təsərrüfatının inkişafı və kreditləşdirilməsi layihələri üzrə hökumətlə müzakirələrdə iştirakdır. Bu layihələr bankın 2006-2010-cu illər üçün nəzərdə tutulmuş Azərbaycan hökuməti ilə yeni əməkdaşlıq strategiyasına daxildir.
Həmin layihələr üzrə kredit sazişi ilə bağlı mayda hökumətlə danışaqlara başlamaq üçün Bakıya missiyalar gəlib. S.Bağırovanın sözlərinə görə, həmin layihələrin maliyyələşdirilməsini 2006-cı maliyyə ilinin sonuna qədər DB Direktorlar Şurasında təsdiqləmək planlaşdırılır.
İlkin hesablamalara görə, kənd təsərrüfatı layihəsinin dəyəri $69 mln., məhkəmə sisteminin müasirləşdirilməsi - $33,6 mln. və səhiyyə sisteminin islahı - $60 mln. təşkil edir.
