İslam İnkişaf Bankı (İİB) ilə İqtisadi İnkişaf Nazirliyi investisiyaların artırılması üzrə beynəlxalq forumun təşkili üçün $274 min həcmində qrant sazişi imzalayıb. Nazirlikdən Trend ə verilən məlumata əsasən, investisiya konfransının noyabrın 7-9-da Bakıda keçirilməsi planlaşdırılıb.
Konfransın keçirilməsi üzrə xərclər əsasən İİB-in üzərinə qoyulub, hökumət isə daxili xərcləri ödəməyi öhdəsinə götürüb.
Qrant sazişinin imzalanması idarəçilərin mayın 30-31-də Küveytdə keçirilən illik iclası çərçivəsində baş tutub. İclasın işində iqtisadi inkişaf naziri Heydər Babayevin rəhbərlik etdiyi Azərbaycan nümayəndə heyəti iştirak edir. Qeyd edək ki, H.Babayev Azərbacyan tərəfindən sazişə imza atıb.
Forum özəl sektora investisiyaların cəlb olunmasına yönəldilib. Forumun İİB və ərəb fondlarının iştirakı ilə hər üç ildən bir keçirilən dəyirmi masa ilə əvəzlənməsi də istisna deyil. Ona görə layihələrin, bukletlərin hazırlanması baxımından forumun keçirilmə tarixi təxirə salına bilər.
Tədbirdə İİB koordinasiya qrupu ölkələrinin 200-250 nümayəndəsinin və eyni sayda yerli qonaqların iştirakı gözlənilir. Analoji konfrans İİB tərəfindən Özbəkistanda təşkil olunub.
