Maliyyə Nazirliyindən Trend ə verilən məlumata əsasən, rəsmi Tbilisi Bakıya olan borcunun restrukturlaşdırılması haqqında müqavilə imzalandıqdan dərhal sonra Azərbaycana $2,7 mln. ödəməyə hazır olduğunu bəyan edib. Gürcüstan həmçinin sənədin imzalanması üçün daxili prosedurları tezləşdirməyi xaşih edib. Lakin Azərbaycanın Maliyyə Nazirliyi hələ səlahiyyətlər almaq üçün hökumətə müraciət etməyib, Gürcüstan tərəfinin isə artıq buna icazəsi var.
Sənədin imzalanmasının yubanması əvvəl Gürcüstandakı kadr dəyişiklikləri, indi isə Bakının iki ölkə arasında gömrük sazişinin imzalanması məsələsinin həllini gözləməsi ilə bağlıdır.
Gürcüstanın Azərbaycana olan borcunun ümumi həcmi $16 189 573 təşkil edir. Yeni varianta görə borcun $3,239 mln. həcmində olan hissəsinin ödənilməsi 2021-ci ilə qədər başa çatmalıdır. Bundan əlavə, $2,7 mln. həcmində borcun ödənilməsi isə bu sazişin qüvvəyə minməsindən sonra başlanacaq. Bu hissəsinin ödənilməsi iki mərhələdə həyata keçiriləcək və 2006-cı ilin sonuna qədər başa çatacaq. Üçüncü hissəyə gəldikdə, bu proses 2010-cu ildə başlanacaq və 2025-ci ilə başa çatacaq. Borca görə faizlər ildə 3% olacaq. Bu borc 1992-1994-cü illərdə ticarət əməliyyatlarının həyata keçirilməsi nəticəsində yaranıb.
