İyulun 18-də Seulda Azərbaycanın investisiya imkanlarına həsr olunmuş biznes forum keçiriləcək. Tədbirin təşkilatçıları Koreyanın Ticarət, Sənaye və Energetika nazirlikləri, Ticarət Sənaye Palatası, Azərbaycanın İqtisadi İnkişaf Nazirliyi və İxrac və İnvestisiyaların Təşviqi Fondudur.
Trend xəbər verir ki, seminarda Koreyanın iş dairələri üçün Azərbaycanın investisiya mühiti, ticarət, sənaye və s. Sahələrdə potensial əməkdaşlıq imkanlarının təqdimat mərasimi keçiriləcək.
Tədbirdə fondun rəhbəri Emil Məcidov, fondun investisiyaların təşviqi üzrə direkoru Anar Quliyev, iqtisadi İnkişaf Nazirliyinin Sahibkarlığın İnkişaf Departamenti və İnvestisiya və Beynəlxalq Əlaqələr Şöbəsinin rəhbərləri Samir Nuriyev və Elşən Məmmədzadənin çıxış edəcəyi gözlənilir.
Səfər çərçivəsində Tikinti və Nəqliyyat, İnformasiya və Kommunikasiya, Ticarət, Sənaye və Energetika nazirlikləri, eləcə də Koreyanın bəzi transmilli korporasiyalarının nümayəndələrilə işguzar görüşlər planlaşdırılıb.
Mayın 11-də İxrac və İnvestisiyaların Təşviqi Fondu İqtisadi İnkiaşf Nazirliyinin dəstəyilə Bakıda Azərbaycan-Koreya biznes forumu keçirib ki, burada Koreyanın 200-ə yaxın sahibkarı iştirak edib. Forum zamanı fondla Koreyanın Ticarət və Sənaye Palatası arasında əməkdaşlıq haqqında saziş imzalanıb.
"Koreyalı həmkarlarımızla əməkdaşlıq onu göstərir ki, onlar Azərbaycanla ikitərəfli iqtisadi əməkdaşlığın bütün potensialından yararlanmağa çalışır" - deyə E.Məcidov vurğulayıb.
