Maliyyə Nazirliyi ölkədə fəaliyyət göstərən sığorta şirkətləri üçün minimal tələblərin artırılması qrafikini açıqlamağa hazırlaşır. Maliyyə naziri Samir Şərifovun xəbər verdiyi kimi, sığorta şirkətlərinin nizamnamə kapitallarına qarşı yeni tələblər üçillik dövrü əhatə edəcək. "Bununla da, sığorta şirkətləri öz fəaliyyətlərini bu tələblər əsasında qurmalı olacaqlar", - deyə nazir qeyd edib.
Onun sözlərinə görə, artım qrafiki "Sığorta haqqında" yeni Qanunun qəbul edilməsindən sonra açıqlanacaq. Bu qanun artıq hazırlanıb və müvafiq nazirliklər və idarələrlə müzakirə edilir. O, payız sessiyasında müzakirə edilmək üçün Milli Məclisə təqdim ediləcək.
Maliyyə Nazirliyi Azərbaycanın maliyyə bazarındakı proseslərlə əlaqədar, sığorta şirkətlərinin kapitallaşma prosesini tezləşdirməyi planlaşdırır. Fəaliyyətdə olan proqrama əsasən sığorta şirkətlərində nizamnamə kapitallarının artırılması 2010-cu ilə qədər 1 mln. manata çatdırılmalıdır. Banklardan tələb edilib ki, onların nizamnamə kapitalı 1 iyul 2007-ci ilə qədər 10 mln. manat olmalıdır.
Maliyyə Nazirliyində iki variant gözdən keçirilir - nizamnamə kapitallarının artırılması üçün müəyyən edilmiş müddətlərin çoxaldılması yolu, və ya həmin qrafikin saxlanması, lakin nizamnamə kapitalına normativ tələblərin parametrlərinin artırılması yolu ilə. Bu barədə Trend ə Maliyyə Nazirliyindən xəbər veriblər.
"Sığorta haqqında" yeni qanuna həmçinin bank sektorunda tətbiq edilən kapitalın kafiliyi haqqında anlayış da daxil ediləcək. Yeni qanunun daha sərq qaydaları olacaq və bank sektorunda tətbiq edilən indikatorlar sığorta sektorunda da olacaq. Bu, bazarın bəzi iştirakçılarının sığorta bazarına avtomatik olaraq maraqlarının itməsinə səbəb olacaq. İndikatorlar müəyyən edildikdən sonra bazarın bəzi üzvləri avtomatik olaraq getməyə məcbur olacaqlar.
