Azərbaycan höküməti gələn il ünvanlı sosial yardım üçün "ehtiyac meyarlarının" həcmində ciddi artım etmək fikrində deyil. Bu barədə Trend ə əmək və sosial müdafiə nazirinin müavini İlqar Rəhimov məlumat verib.
Nazirlər Kabinetinin qərarı ilə 1 iyul 2006-cı ildən verilən ünvanlı dövlət sosial yardımını almaq üçün "ehtiyac meyarları" 30 manat (150 min köhnə manat) həcmində müəyyənləşdirilib.
"Bu həddin artırılması məsələsinə çox ciddi və dürüst yanaşmaq lazımdır. Biz bütün makroiqtisadi göstəriciləri götür-qoy etməli, inflyasiyanın artım tempinə, pul kütləsinə, əmək haqqının, təqaüdün artmasına diqqət etməliyik, çünki heç kim əlavə pul kütləsinin inflyasiyaya səbəb olmasını istəmir", - deyə nazir müavini qeyd edib.
Əmək Nazirliyinin proqnozlarına görə, 2006-cı ildə 50 min ailə (250 min nəfər) ünvanlı sosial yardım alacaq. Orta hesabla adambaşına 10-11 manat ünvanlı yardım düşür və bu, inflyasiyaya səbəb ola bilər.
"Nazirliyimiz bu məsələni hərtərəfli şəkildə öyrənir və 2007-ci il üçün proqnozların formalaşdırılması çərçivəsində bir neçə variant təklif olunur. İnflyasiya və makroiqtisadi göstəricilərdən asılı olaraq, biz populistik addımlar atmayacağıq. Biz bu gün meyarları 50-60 manata qədər artıra bilərik, lakin bu, bir-neçə ay çəkə bilər, sonra isə müvəffəqiyyətsizliyə uğraya bilər. Ona görə artım az olacaq", - deyə İ.Rəhimov qeyd edib. Onun sözlərinə görə, hazırda iki variant gözdən keçirilir: 35 və ya 40 manata qədər artım.
2006-cı ildə dövlət büdcəsindən ünvanlı sosial yardımın verilməsi üçün 72 mln. manat ayrılıb, lakin yardımın yarım il üçün veriləcəyini nəzərə alaraq, büdcə vəsaitlərinə qənaət oluna bilər.