2006-cı il üçün ölkəyə suveren reytinqin verilməsi məqsədi ilə Azərbaycandakı iqtisadi durumun icmalını aparmaqdan ötrü "Fitch Ratings" beynəlxalq reytinq agentliyinin təmsilçilərindən ibarət nümayəndə heyətinin noyabrda Bakıya səfəri gözlənilir. Maliyyə Nazirliyindən Trend ə verilən məlumata görə, bununla əlaqədar olaraq Azərbaycan tərəfi agentliyin Moskva ofisinə gələcəkdə reytinqin verilməsi üçün "Fitch"i maraqlandıran sualları göndərmələri barədə dəfələrlə müraciət edib.
İlin əvvəlində "Fitch Ratings", əvvəlki səviyyəni saxlayaraq, Azərbaycan üçün BB səviyyəsində (2004-cü ildə olduğu kimi) suveren reytinqləri, "sabit" proqnozu təsdiq edib. Eyni zamanda, agentlik B səviyyəsində qısamüddətli reytinqi və "ölkə tavanı" - BB reytinqini təsdiqləyib.
Ölkənin qiymətləndirilməsi Maliyyə Nazirliyi ilə "Fitch Ratings" agentliyi arasında 2005-ci ilin iyulunda bağlanmış üçillik müqavilə əsasında həyata keçiriləcək. Əldə lunmuş razılaşmaya əsasən, reytinq agentliyi suveren reytinqin verilməsi məqsədi ilə 2005-07-ci illərdə ölkənin icmalını aparacaq. "Fitch Ratings"in xidmətlərini ödəmək üçün Maliyyə Nazirliyi hər il dövlət büdcəsinə 40 min funt sterlinq məbləğində vəsait yatırır.
Sentyabrın 14-də isə Azərbaycan ilk dəfə olaraq ikinci beynəlxalq reytinq agentliyindən - "Moody's Investor Services"dən reytinq alıb. Bu agentlik ölkəyə "Fitch Ratings"in elan etdiyi reytinqdən bir pillə yuxarı və investisiya səviyyəsindən bir pillə aşağı reytinq verib. "Moody's Investor Services"in qiymətləndirmələrinə görə, ölkəyə Ba1 svəiyyəsində reytinq verilib. 2007-ci ildə hökumət hər iki agentlikdən investisiya reytinqi almağa ümid bəsləyir.