İslam İnkişaf Bankının (İİB) Ölkə üzrə əməliyyatlar departamentinin direktoru Məhəmməd Yusuf Xanın başçılıq etdiyi İİB missiyası Azərbaycan höküməti ilə yeni əməkdaşlıq proqramına daxil olacaq layihələrin müəyyən edilməsi üçün müvafiq nazirlik və idarələrdə görüşlərə başlayıb. İqtisadi İnkişaf Nazirliyindən (İİN) Trend ə verilən məlumata görə, proqram 2007-09-cu illər üçün nəzərdə tutulub.
İslam bankının əvvəlki şərtləri olduğu kimi qalıb və ölkə hər il bankdan bir güzəştli, iki kommersiya krediti və bir-iki qrant ala bilər. Bununla əlaqədar bu meyarlara aid layihələri müəyyən etmək tələb olunur. Ölkə üçün güzəştli maliyyələşdirmə məsələsi artıq əvvəlkindən az nəzərdə tutulub və bu, Azərbaycanda iqtisadi artım templəri ilə izah olunur.
İİB və AR arasında proqram hər il gözdən keçirilir, çünki ölkəyə prioritetləri müəyyən etmək və proqramda dəyişikliklər etmək hüququ verilir. Bu il bank bu təcrübədən istifadə etməyib. Yeni proqram üçün layihələri aşkar etmək üçün missiya İqtisadi İnkişaf, Maliyyə, Nəqliyyat Nazrilklərində, "Azərsu", "Meliorasiya və su təsərrüfatı" səhmdar cəmiyyətlərində görüşlər keçirir. Əvvəl hökümətə təqdim edilmiş 2006-07-ci illər üçün əməkdaşlıq proqramının ilkin variantına energetika, su təsərrüfatı və maliyyə sektorunun layihələri daxil edilib.
Hazırda əməkdaşlıq 2004-06-cı illər üçün nəzərdə tutulmuş proqram əsasında həyata keçirilir. Gələn həftə İİB ekspertləri bu bankın vəsaitləri hesabına maliyyələşdirilən mövcud layihələrin icmalına başlayacaq.
İndiyədək bank tərəfindən maliyyələşdirilmiş ümumi dəyəri 150 mln. ABŞ dolları olan 12 Azərbaycan layihəsindən yalnız 4-ü kommersiya şəraitində 61 mln. ABŞ dolları məbləğində olub. Onlar Ələt-Qazıməmməd avtomobil yolunun, Mingəçevir elektrik stansiyasının, Ucar-Yevlax yolunun və Xaçmaz yarımstansiyasının tikinti layihələrinin gerçəkləşdirilməsinə yönəldilib.
Bank tərəfindən Azərbaycana göstərilən texniki yardımın həcmi təxminən 4 mln. ABŞ dollarıdır.