Azərbaycan Maliyyə Nazirliyi ölkədə fəaliyyət göstərən sığorta və yenidən sığorta şirkətlərinin kapitalına minimal tələblərin artırılması planlarını müəyyənləşdirib. Nazirliyin dövlət sığorta nəzarəti şöbəsinin başçısı Namiq Xəlilovun Trend ə verdiyi xəbərə görə, yeni qrafik "Sığorta haqqında" qanunun qüvvəyə minməsindən sonra elan olunacaq.
N.Xəlilovun sözlərinə görə, qrafik 1 iyul 2007-ci ildən işləməyə başlayacaq. Sığortaçıların yeni tələblər haqqında artıq indidən bilmələri və kapitalların artırılması üzrə tədbir görmələri üçün onlar artıq xəbərdar ediliblər.
İlin sonunadək onlar köhnə qrafikə əsaslanacaqlar və 1 yanvar 2007-ci ildə sığorta şirkətlərinin nizamnamə kapitalı 700 min manat təşkil etməlidir. Yeni qrafikə əsasən gələn ilin iyul ayından etibarən şirkətlərin kapitalı 1 mln. manata, 2010-cu ilə qədər isə - 3 mln. manata çatdırılmalıdır. Yenidən sığorta şirkətləri üçün o, ikiqat, yəni 6 mln. manata qədər artacaq.
Hazırda Maliyyə Nazirliyi aralıq tələblərin hansı intervallarda - yarımillik və ya illik intervallarda qoyulacağını müəyyənləşdirir. N.Xəlilov qeyd edib ki, yenidən yaradılan sığorta və yenidən sığorta şirkətlərində kapital müvafiq olaraq 3 mln. və 6 mln. səviyyəsində formalaşmalıdır.
1 iyul 2006-cı ildə Azərbaycanda fəaliyyət göstərən 28 sığorta şirkətinin ümumi kapitalı 35,89 mln. manat təşkil edib. 2005-ci ilin analoji dövrü ilə müqayisədə artım 41,7% (10,56 mln. manat) təşkil edib.