...

DB Azərbaycanda pensiya layihəsinin təhlilini aparacaq

Biznes və iqtisadiyyat xəbərləri Materials 19 Oktyabr 2006 16:40 (UTC +04:00)

Trend-i buradan izləyin

Azərbaycanda pensiya və sosial islahatların dəstəklənməsi üzrə kredit (PSAP) çərçivəsində Dünya Bankının (DB) layihə rəhbəri Aleksandra Pasarakın bu gün Bakıya səfəri başlayıb. Bankın Bakı ofisindən Trend ə verilən məlumata görə, səfərdə əsas məqsəd layihənin həyata keçirilməsi ilə tanış olmaqdır.

Layihənin ümumi məbləği $15,8 mln. təşkil edir. Bunun da $10 mln.-u DB-nin payına düşür. Layihə üç hissədən ibarətdir. Birinci hissə sosial yardımın idarə edilməsi sisteminin təkmilləşdirilməsini, 2006-cı ilin iyul ayından tətbiq olunan ünvanlı sosial yardım proqramının yaradılmasını nəzərdə tutur. Bu hissə Əmək və Əhalinin Sosial Müdafiəsi Nazirliyinə şamil edilir. Bu yaxınlarda Dünya Bankı Əmək və Əhalinin Sosial Müdafiəsi Nazirliyinin ünvanlı dövlət sosial yardımın tətbiqi çərçivəsində nazirlikdə korporativ şəbəkənin yaradılması ilə bağlı təklifini qəbul edib. Həmin təklif nazirliyin yerlərdəki şöbələrində nəzarəti həyata keçirmək üçün server və qlobal şəbəkənin yaradılmasını və ünvanlı sosial yardımın verilməsinin monitorinqini nəzərdə tutur.

Məlumatların mərkəzləşdirilmiş şəkildə vahid serverdə yığılması ünvanlı yardımın verilməsində şəffaflığı təmin edəcək. Serverin 2006-cı ilin sonuna kimi yaradılması nəzərdə tutulur və artıq bunun üçün şirkət seçilib. Qlobal sistem 2007-08-ci illər ərzində yaradılacaq. Bu isə Əmək Nazirliyinin Azərbaycanda yaradılan elektron hökumətə qoşulmasına imkan yaradacaq. DB həmçinin İT-qrupun yaradılması ilə bağlı təkliflə razılaşıb. Bu qrup informasiya sisteminin tətbiqinə yardım edəcək və Əmək Nazirliyində kadrların gücləndirilməsi məqsədi ilə tədris proqramları keçirəcək. Pensiya təminatı üçün DB kreditindən $5 mln., dövlət büdcəsindən isə $2,9 mln. ayrılacaq.

İkinci hissə sosial sığortanın idarə olunması sisteminin təkmilləşdirilməsi üçün nəzərdə tutulub. Fərdi uçot sistemi 2007-ci ildən işləyəcək. Hal-hazırda işləyənlərə fərdi şəhadətnamələrin verilməsi başa çatmaqdadır. Sosial islahatlara $8 mln. vəsait nəzərdə tutulub. Burada $5 mln -u DB krediti hesabına, $800 mini BMT-nin İnkişaf Proqramı, qalanı isə dövlət büdcəsi və Dövlət Fondunun vəsaitləri hesabına ödəniləcək.

Üçüncü hissə layihənin idarə edilməsi, monitorinq və qiymətləndirmədən ibarətdir.

Azərbaycan hökuməti ilə DB arasında PSAP üzrə kredit sazişi 2004-cü ilin sentyabrın 23-də imzalanıb. 2004-cü ilin noyabrın 11-də isə sənəd qüvvəyə minib. PSAP əsasında DB Azərbaycana $10 mln.-u, 10 ili güzəştli olmaqla, 35 il müddətinə və illik 0,75 faiz dərəcəsi ilə ayırıb. Kredit 2004-cü ilin iyunun 10-da bankın direktorlar şurası tərəfindən təsdiqlənib. Onun xərclənmə müddəti isə 2009-cu ilin fevralın 28-dək nəzərdə tutulub.

Xəbər lenti

Xəbər lenti