Dövlət təminatlı kreditlər üzrə koordinator və Azərbaycan Nazirlər Kabinetinin texniki yardım və qrantlar şöbəsinin rəhbəri Nail Fətəliyevin Trend ə verdiyi məlumata görə, Beynəlxalq Əməkdaşlıq üzrə Yaponiya Bankı ölkənin altı şəhərinin (üç şəhər Kür boyunda və üç şəhər ölkənin şimal hissəsində) su təchizatı və kanalizasiya sisteminin yaxşılaşdırılması ilə bağlı layihəyə daxil edilməsi ilə bağlı Azərbaycan hökumətinin təklifini qəbul edib. Onun sözlərinə görə, yaxın günlərdə qiymətləndirmə işlərinin aparılması üçün bank heyətinin Bakıya gəlişi gözlənilir.
İlkin qiymətləndirmələrə görə, layihənin dəyəri 150-160 dollar həcmində qiymətləndirilir. Təqdim olunan şəhərlərdə Hitachi şirkəti suyun tərkibinin analizini aparıb. Şirkət Azərbaycan hökumətinə layihədə istifadəsi nəzərdə tutulan sutəmizləyici blokların Azərbaycanda birgə istehsalını təklif edib.
Bu şirkət əvvəllər fövqəladə hallar üçün nəzərdə tutulan, hazırda isə təkmilləşdirilmiş aqreqatların istehsalı ilə məşğul olur. Lakin analizlərin nəticələrinə əsasən məlum olub ki, həmin qurğular Kür suyunu beynəlxalq standartlar səviyyəsində təmizləməyə qabil deyil. Kür suyunun təmizlənməsi ilə bağlı yaranmış səbəb üzündən Azərbaycan tərəfinə həmin üç şəhərin layihədən çıxarılaraq, suyun təmizlənməsinin beynəlxalq standartlar səviyyəsinə çatdırılması mümkün olan başqa üç şəhərlə əvəz edilməsi təklif olunub. N.Fətəliyevin sözlərinə görə, hökumət həmin şəhərləri layihədən çıxarmaqdan imtina etmiş, digər şirkətlər tərəfindən təklif olunan başqa təmizləyici qurğulardan istifadə edilməsini təklif etmişdir.
Müəssisə maşınqayırma kompleksindəki mövcud zavodların bazasında qurulacaq. Hazırda layihə üçün yer seçilir. Birgə müəssisə yaradılacağı təqdirdə hər iki tərəfin vəsaitindən istifadə olunacaq, lakin bu xərclər layihənin dəyərinə daxil edilməyəcək.