Azərbaycan İqtisadi İnkişaf Nazirliyi və Azərbaycan İxracat və İnvestisiyaların Təşviqi Fondu (AZPROMO) 2007-ci il fevralın 15-də Berlində keçiriləcək biznes-forumun hazırlığına başlayıb.
İİN Sahibkarlığın inkişafı üzrə departamentin müdiri Samir Nuriyevin şənbə günü Trend ə bildirdiyinə görə, bu 2007-ci ildə keçiriləcək ilk biznes-forum olacaq.
Azərbaycan-Almaniya biznes-forumunu hələ 2006-cı ilin dekabr ayında Ştutqardda keçirmək planlaşdırılmışdı, lakin təxirə salındı. Bununla əlaqədar olaraq tədbirin keçirilmə yeri də dəyişdirilib. Tədbirin Berlində keçirilməsi planlaşdırılıb.
S.Nuriyevin sözlərinə görə, Azərbaycandan 25 sahibkarın iştirakı gözlənilir.
O bildirib: "Azərbaycan şirkətləri tərəfindən böyük maraq göstərilir, lakin biznes-forumda təmsil olanacaq şirkətlərin fəaliyyət sahəsi Azərbaycanın Almaniyadakı səfirliyindən Almaniya sahibkarları və investorlarının maraqları ilə bağlı informasiya alındaqdan sonra müəyyən ediləcək".
