Dövlət əmlakının idarə edilməsi üzrə Dövlət Komitəsi fiziki və hüquqi şəxslər tərəfindən icarə haqqlarının dövlət büdcəsinə ödənilməsi sisteminin təkmilləşdirilməsi üzrə tədbirləri davam etdirir.
Dövlət komitəsindən Trend ə verilən məlumata görə, müasir informasiya texnologiyalarının imkanlarından istifadə etməklə artıq yeni elektron ödəniş sisteminin yaradılması üzrə iş başlayıb. Bu, müxtəlif bölgələrdə icarə haqqlarının banklar və onların yerli xidmət məntəqələri vasitəsilə ödənilməsinə imkan verəcək.
Dövlət Komitəsində qeyd olunub ki, yeni sistemin tətbiq edilməsi ilə bağlı artıq texniki və proqram təminatı hazırlanıb. Həmçinin hər bir icarəçinin müqaviləsinə uyğun kodlaşdırılma aparılacaq, bununla bağlı onlara bildirişlər göndərilir. Gələcəkdə ödəniş sisteminin sadələşdirilməsi üçün kartların tətbiqi nəzərdə tutulub.
Əsas məqsəd isə dövlət büdcəsinə ödənişlərdə operativlik və şəffaflığın təmin olunmasıdır. Hələ icarəyə görə ödəniş istiqamətində problemlər qalır və icarə haqqına görə yaranan borcun təcili ödənişini təmin etmək üçün Dövlət komitəsi yalnız 2006-cı ildə təxminən 2000 icarəçiyə bildiriş göndərib. Onlardan 900 icarəçiyə dair məhkəmə orqanlarına iddia verilib.
