Azərbaycan, Bakı /müx. Trend İ.Xəlilova / Azərbaycan-Rusiya iqtisadi əməkdaşlıq üzrə hökumətlərarası komissiyasının Xİ iclası 2007-ci ilin payızından tez keçirilməyəcək. Bu məlumatı Rusiyanın ölkəmizdəki səfirliyinin nümayəndəsi Yuri Şedrin verib. Qeyd edək k i, komissiyanın iclası aprelin 24-də Moskvada keçirilməsi planlaşdırılırdı. Y.Şedrinin sözlərinə görə, toplantının təxirə salınmasının əsas səbəbi texniki-təşkilati məsələlərin həllinin vacibliyi ilə bağlıdır. "Tərəflərin katiblikləri iclasın tarixlərini razılaşdıra bilmirlər. Çünki çoxlu materiallar var. Bu səbəbdən də iclas təxirə salındı" - deyə o bildirib.
Y.Şedrin həmçinin ikitərəfli iqtisadi əlaqələrin genişləndirilməsinin vacibliyini vurğulayıb. Qeyri-neft sektorundakı əməkdaşlığın gücləndirilməsinin zəruriliyini önə çəkən səfirlik təmsilçisi hesab edir ki, bu, Rusiya qazının Azərbaycana nəqlinin dayandırılması nəticəsində ticarət dövriyyəsində yaranan çatışmazlıqları aradan qaldırmağa yardım edəcək.
Məlumat üçün bildirək ki, 2006-cı ildə Rusiya ilə Azərbaycan arasındakı mal dövriyyəsinin artım templəri artaraq 1,5 milyard dollara çatmışdır. Əməkdaşlığın əsas perspektiv istiqamətləri arasında metallurqiya və maşınqayırma kimi sahələr dəyərləndirilir. Bununla yanaşı energetika sahəsində də əməkdaşlıq istisna olunmur. Belə ki, "Qazprom" Rusiyanın cənub bölgələrinin qış aylarında təbii qazla təminatı məqsədi ilə Azərbaycandakı qaz anbarlarının güclərinin artırılması təklifləri ilə çıxış edib.
