Azərbaycan, Bakı/ Trend müxbir İ.Xalilova / Aprel ayında istehlak malları və xidmət tariflərinin qiymətinin artım tempi 0,4 faiz, 2006-cı ilin müvafiq ayı ilı müqayisədə isə 16 faiz təşkil edib. Bu barədə məlumat Dövlət Statistika Komitəsindən verilib. Aprel ayında ərzaq mallarının qiyməti 0.5 faiz, qeyri ərzaq mallarının qiyməti 0,4 faiz, xidmətlərə görə tariflər isə 0,1% artıb.
Statistika Komitəsi aprel ayında qiymət artımını aşağıdakı kimi qeydə alıb: çörək məhsulları 0,2%, tərəvəz 2,1%, meyvə 2,3%, mineral su, soyudulmuş içki və şirələr 0,3%, şəkər və qənnadı məhsulları 0,1%, bitki yağı və yağlar 0,2%, pivə 1,1%, çay, kofe və kakao 0,3 faiz, spirtli içkilər 0,8 faiz, ət məhsulları 0,2%.
Bu dövr ərzində balıq (0,5%) və süd məhsulları, pendir və yumurtanın qiyməti (0,8%) düşüb.
Ötən ilin müvafiq dövrü ilə müqayisədə yanvar-aprel ayları ərzində inflyasiyanın artım tempi 16,5 faiz təşkil edib. Ərzaq mallarının qiyməti 17%, qeyri ərzaq mallarının qiyməti 9,8%, xidmətlərə görə tariflər 23% artıb. Ötən ilin aprel ayı ilə müqayisədə 2007-ci ilin aprel ayında ərzaq mallarının qiyməti 15,9%, qeyri ərzaq mallarının qiyməti 10,3%, xidmət tarifləri isə 23% artıb.
