Azərbaycan, Bakı/ Trend müxbir S.Əliyev/ Türkiyənin Yukcel Domonic şirkəti Bakı-Tiflis-Qars dəmir yolu marşrutunun Gürcüstan hissəsinin tikintisi üzrə layihənin hazırlanmasını başa çatdırıb. Bu barədə cümə axşamı Azərbaycanın Nəqliyyat Nazirliyindən məlumat verilib.
Sabah Tiflisdə keçiriləcək Azərbaycan, Gürcüstan və Türkiyə Nəqliyyat nazirlikləri ekspertlərinin görüşündə bu layihə müzakirə olunacaq. Yaxın zamanlarda dəmir yolunun Gürcüstan hissəsinin tikintisi üzrə tenderin keçirilməsi planlaşdırılır. Türkiyə artıq Qarsdan Gürcüstan sərhədinə qədər dəmir yolunun tikintisi üzrə tender elan edib.
2007-ci ilin avqustunda Azərbaycan Dövlət Neft Fondu (ARDNF) dəmir yolunun tikintisi üçün Gürcüstana veriləcək kreditin birinci tranşı kimi 40 mln. dollar köçürməyi planlaşdırır. Kreditin ümumi məbləği 200 mln. dollar təşkil edir. Kredit 1 faiz dərəcəsi ilə 25 il müddətinə ayrılıb.
Bu layihə üzrə tikinti işlərinin bu il başlanılması nəzərdə tutulur. Hökumətin müvəkkil bankı qismində Azərbaycan Beynəlxalq Bankı seçilib.
Prezidentin sərəncamına əsasən, Tiflis-Qars dəmir yolunun çəkilməsi çərçivəsində nəqliyyat naziri Ziya Məmmədovun başçılığı ilə Dövlət Komissiyası yaradılıb. Komissiyanın tərkibinə Maliyyə, Xarici İşlər, İqtisadi İnkişaf nazirliklərinin nümayəndələri, ARDNF, Dəmir Yolu və ABB-nin rəhbərləri daxildir. Azərbaycan tərəfdən layihənin koordinatoru kimi Nəqliyyat Nazirliyi təyin olunub.