Azərbaycan, Bakı /müx. Trend Ü.İsmayılova / Çərşənbə axşamı iqtisadi inkişaf nazirinin müavini Niyazi Səfərovun verdiyi məlumata görə, Azərbaycanda azad iqtisadi zonalar barədə qanun layihəsi hazırda dövlət strukturları tərəfindən müzakirə olunur.
"Sənədin razılaşdırılması mərhələsi sona çatmaqdadır. Məsələ geniş müzakirəyə səbəb olub, belə ki, bu kimi iqtisadi fəaliyyət ölkədə mövcud olmayıb" - deyə o bildirib.
Nazir müavininin sözlərinə görə, nazirlikdə azad iqtisadi zonanın rejimi, güzəştlər, menecmentin təşkili, infrastrukturun inkişafı məsələləri ilə əlaqədar müzakirələr aparılır.
"Qanun layihəsinin təqdim olunduğu bütün orqanlarda bu müzakirələrə böyük maraq göstəriblər. Güman ki, yay aylarında biz layihəni təsdiqlənməsi üçün Nazirlər Kabinetinə göndərəcəyik" - deyə Səfərov bildirib.