Azərbaycan, Bakı/ Trend müxbir İ.Xəlilova/Almaniyanın KFW İnkişaf Bankı kredit-zəmanət Fondu (KZF) üçün məsləhətçi qismində Azərbaycan hökumətinə Almaniyanın Beynəlxalq əməkdaşlıq üzrə əmanət kassaları Fondunu (SBFIC) məsləhət görüb. Bu barədə çərşənbə axşamı KFW Bakı ofisinin rəhbəri Natiq Abdullayev məlumat verib. Onun sözlərinə görə, SBFIC bu istiqamətdə Gürcüstan və Ermənistanda təcrübəyə malikdir, buna görə də Azərbaycan tərəfi artıq şifahi şəkildə bununla razılaşıb.
Bu, regional layihədir və digər Qafqaz ölkələrində KZF-lər artıq fəaliyyət göstərməyə başlayıb. Bundan əlavə, SBFIC artıq Azərbaycanda fəaliyyət göstərir və Almaniya-Azərbaycan fondunu idarə edir, həmçinin Bank Respublika-nın səhmdarlarından biridir.
"Kredit-zəmanət fondu məsləhətçi gəldikdən dərhal sonra, avqust-sentyanbr aylarında fəaliyyətə başalayacaq", - deyə Abdullayev bildirib.
KFW layihənin həyata keçirilməsi üçün 4 mln. avro təqdim edib ki, bunun da 3,75 mln. avrosu fondun yaradılması üçün zəmanət və 0,25 mln. avrosu məsləhət xidmətlərinin ödənilməsinə sərf olunacaq. Fond ayrıca bir qurum kimi yox, KFW-nin mənzil-qərargahında bir hesab kimi fəaliyyət göstərməlidir. Alman bankının Bakı ofisi rəhbərinin sözlərinə görə, Azərbaycan bankları müraciət edəcəyi təqdirdə məsləhətçi onları yoxlayacaq və KFW qarşısında zəmanətlə çıxış edəcək. Konsepsiyada KZF üçün yeni müvəkkil bankların seçilməsi nəzərdə tutulub, amma Almaniya-Azərbaycan fondu və Azərbaycan mikromaliyyələşdirmə bankının da iştirak etməsi istisna olunmur. Vəziyyət məsləhətçi birinci qiymətləndirmə hesabatını hazırladıqdan sonra aydınlaşacaq. Bundan sonra bankların seçilməsi üçün yeni tender keçirilməsinin lazımlığı müəyyənləşəcək.
Azərbaycan bankları AAA+ reytinqinə malik olan KFW kreditləşməsi şərtilə beynəlxalq banklardan vəsait ala biləcəklər. İlkin mərhələdə fondun həcmi 2,3 mln. avro olacaq. KZF bank tərəfindən cəlb olunan kredit xətlərində limitə malik olmayacaq, amma ilkin mərhələdə zəmanətin həcmi 500 min avronu ötməyəcək. KFW zəmanəti ilə vəsaitlər cəlb olunduqda banklar bir müraciət edənə 150 min avrodan artıq kredit verə biləcəklər.
Azərbaycanda kredit-zəmanət fondunun yaradılmasının maliyyələşdirilməsi üzrə hökumətlərarası razılaşma fevral ayında Azərbaycan prezidenti İlham Əliyevin Bonna (Almaniyaya) səfəri zamanı imzalanıb.
2006-cı ilin avqustunda Azərbaycan-Almaniya hökumətlərarası danışıqlarında KFW inkişaf bankı ilə kredit-zəmanət fondunun fəaliyyəti üçün xüsusi şərtlər və maliyyələşdirmə haqqında müqavilə imzalanıb.
