Azərbaycan, Bakı, 07 fevral/ Trend , müxbir A.Bədəlova/ "Nabukko" qaz kəmərinin tikintisi üzrə konsorsiumun altıncı iştirakçısı olan Almaniyanın RWE şirkəti layihəni, orta hesabla, $6,8 mlrd. qiymətləndirir. Bu barədə RWE-nin investisiya münasibətləri üzrə meneceri Liz Kristi (Liz Christie) məlumat verib.
"Qaz kəmərinin ["Nabukko"] ümumi qiymətinin [tikinti] beş-altı mrld. avro təşkil edəcəyi gözlənilir ($6,17 mlrd. - $7,4 mlrd.)", - Kristi cümə axşamı Trend -a bildirib.
Bu həftə RWE altıncı iştirakçı kimi "Nabukko" layihəsinə daxil olub. Layihənin digər beş iştirakçısı Avstriyanın OMV, Macarıstanın Mol şirkətləri və üç dövlət - Bolqarıstanın Bulgargaz, Rumıniyanın Transgaz və Türkiyənin Botas şirkətidir. İştirakçılardan hər biri 16,67 faiz bərabər paya malikdirlər.
Alman şirkəti Cənub-Şərqi, Mərkəzi və Şimal-Qərbi Avropada 10 mln.-dan çox qaz alıcısına malikdir. Şirkətin konsrosiumdakı fəaliyyəti "Nabukko" boru kəməri ilə nəql ediləcək qazın etibarlı alıcısına çevirlməsinə yönələcək.
Buraxılış gücü ildə 31 mlrd. kubmetr, uzunluğu 3 300 km. olacaq "Nabukko" boru kəməri Türkiyədən Bolqarıstan, Rumıniya və Macarıstan vasitəsilə, Vyana yaxınlığında yerləşən Baumqartenədək keçəcək. İlkin buraxılış gücü ildə 8 mlrd. kubmetr olan qaz kəməri 2012-ci ilədək çəkiləcək. Birinci tədarük 2013-cü ildə başlayacaq.
"Nabukko" kəməri ilə Azərbaycan və Mərkəzi Asiya qazı Aİ ölkələrinə nəql olunacaq. Mərkəzi Asiyadan "Nabukko"ya qədər qaz Xəzərin dibi ilə çəkiləcək "Transxəzər" qaz kəməri ilə nəql oluna bilər. "Transxəzər" qaz kəməri Qazaxıstan və ya Türkmənistanın Xəzər dənizi sahilindən qaz ehtiyatlarının altı trln. kubmetr təşkil etdiyi güman edilən Azərbaycana qədər çəkilə bilər. Mərkəzi Asiya qazı Azərbaycandan "Nabukko"-ya daxil olanadək hazırda fəaliyyət göstərən Cənub-Qafqaz qaz kəməri (Bakı-Tbilisi-Ərzurum). vasitəsilə çatdırılacaq.
