Azərbaycan, Bakı, 06 iyun / Trend , müxbir A.Bədəlova/ Yayın sonunadək Qazaxıstanın "Tenqiz" yatağını işlədən "Tenqizşevroyl" konsorsiumunun Azərbaycan ərazisindən neft tədarükü tranzitinə başlaması gözlənilir. Bu haqda "Cross Caspian Oil & Gas" loqistika şirkətinin baş direktoru vəzifəsini yerinə yetirən Dmitri Solovyov
bildirib
Azərbaycan ərazisindən neftin nəqlinə dair müqavilə yaxınlarda imzalanacaq. ""Tenqizşevroyl" ilə müqavilə bizim üçün son dərəcə prioritetli layihədir. Biz müqavilə üzərində işi başa çatdırmışıq. Hazırda son mərhələdə - sözügedən müqavilənin imzalanmasının astanasındayıq. Tərəflərin bütün mövqeləri müəyyənləşdirilib. Ümid edirik ki, müqavilə yaxınlarda imzalanacaq", - deyə Solovyov bildirib.
Solovyovun sözlərinə görə, nəql müqavilə imzalandıqdan bir neçə ay sonra başlayacaq. O, həcmin nə qədər olduğunu bildirməyib, lakin "onların kifayət qədər ciddi" olacağını qeyd edib.
Əvvəllər, "Tenqizşevroyl"-un Azərbaycan ərazisindən neft tədarükü həcminin ildə təxminən 5 mln. ton olacağı qeyd olunurdu. Bu həcmin bir hissəsi Chevronun iştirak payı olan Bakı-Tbilisi-Ceyhan boru kəmərinə, digər hissəsinin Gürcüstanın Qara dəniz limanları istiqamətində dəmir yolu ilə göndəriləcəyi gözlənilir. Azərbaycana neft tankerlər vasitəsilə gətiriləcək.
"Cross Caspian Oil & Gas Logistics" Xəzər-Qara dəniz tranzit dəhlizi üzrə karbohidrogenin daşınması üçün nəqliyyat komplekslərini təklif edən qabaqcıl şirkətlərdən biridir.
