Azərbaycan, Bakı, 10 sentyabr / Trend , müxbir A.Bədəlova/ Azərbaycan və Gürcüstan Azərbaycan qazının ölkəyə tədarük həcminin artırılması üzrə danışıqlar aparır. Bu barədə çərşənbə axşamı Bakıda Gürcüstanın energetika naziri Aleksandr Xetaquri bildirib.
Xetaquri bildirib ki, bu gün Azərbaycan Gürcüstana sutkada 1,5 mln. kubmetr qaz tədarük edir. Qışda tədarük həcminin artırılması nəzərdə tutulub, lakin nazir dəqiq həcm açıqlamayıb. Onun sözlərinə görə, qazın dəyəri ətrafında da müzakirələr aparılır.
Gürcüstana qaz tədarükü üzrə müqavilə Azərbaycan Dövlət Neft Şirəkti ilə bağlanıb. Şirkət 2008-ci ildə şəxsi yataqlarından hasil etdiyi qazın təqribən 600 mln. kubmetrini Gürcüstana tədarük edəcək.
2007-ci ildə Gürcüstana qaz tədarükü həcmi sutkada təqribən 1,2-1,3 mln. kubmetr təşkil edib. Qazın 1000 kubmetri 120 dollara satılıb. Azərbaycandan bu ölkəyə tədarük olunan qaz dəyərinin 2009-cu ildə artırılacağı gözlənilirdi. Lakin hazırki qiymətlər açıqlanmır.
Məqalə müəllifi ilə əlaqə ünvanı - [email protected]
