Azərbaycan, Bakı, 14 yanvar / Trend , müxbir A.Bədəlova/ ABŞ-ın Dövlət Enerji İnformasiya İdarəsi (EİA) OPEK-in gəlirlərinin 2009-cu ilin 387 mlrd. dollarına nisbətdə 2010-cı ildə 139 mlrd. dollar artaraq 526 mlrd. dollar təşkil edəcəyini proqnozlaşdırır.
OPEK-in 2008-ci ilin yanvar-dekabr ərzində neft ixracatdan əldə etdiyi gəlir 972 mlrd. dollar təşkil edib, bu isə 2007-ci ilin göstəricisindən 42 faiz artıqdır. 2008-ci ildə gəlirin böyük hissəsi Səudiyə Ərəbistanının payına düşüb - 288 mlrd. dollar, bu da təşkilatın ötənilki gəlirlərinin 30 faizi deməkdir.
EİA-nın proqnozlarına görə, bu il OPEK-in gəlirləri 2008-ci ilə nisbətdə 585 mlrd. dollar azalacaq.
EİA-nın rəyinə görə, 2009-cu ildə OPEK-də neft tədarükü üzrə ümumi həcm 2008-ci ilin 35,75 mln.barelinə nisbətdə sutka ərzində 35,04 mln. barel təşkil edəcək. Proqnozlara əsasən, 2010-cu ildə tədarükün həcmi sutkada 1,57 mln. barel artaraq 26,61 mln. barel təşkil edəcək.
Dövlət Enerji İnformasiya İdarəsi Konqres tərəfindən 1977-ci ildə yaradılmış, ABŞ-ın Energetika üzrə Departamentinin statistika agentliyidir.
Məqalə müəllifi ilə əlaqə ünvanı: [email protected]
