Azərbaycan, Bakı, 05 mart / Trend / "2008-ci ildə Xəzər Dənizi Neft Donanmasının (XDND) dalğıc və qəza-xilasetmə idarəsi proqnozlaşdırılan 9,4 milyon manat əvəzinə 10,5 milyon manatlıq iş həyata keçirib", - XDND-nin daxil olduğu SOCAR-ın (Azərbaycan Respublikası Dövlət Neft Şirkəti) məlumatında deyilir.
Ümumilikdə, idarədə 115 dalğıc və 10 xüsusi gəmi işləyir. Dəniz neft hasilatı obyektlərində 18 dalğıc stansiyası yaradılıb.
Ötən il bu idarənin 15 dalğıcı "Ümid-1" perspektiv strukturunda eyniadlı platformanın iki blokunun quraşdırılmasında iştirak edib. Platforma suyun 58 metr dərinliyində quraşdırılıb. Blokların sahildən struktura nəqli prosesində, eləcə də onların nöqtədə quraşdırılmasında "Avior", "Geofizik", "Təbriz Xəlilbəyli" və "Orion" xilasedici gəmiləri də iştirak edib.
Bununla yanaşı, ötən il 15 dalğıc Kulevi limanında (Gürcüstan) Azərbaycan Qara Dəniz Neft Terminalının tikintisində də iştirak edib. Dalğıclar hələ sovet dövründə batmış gəmilərin dəniz dibindəki artıqlarından təmizlənməsində, böyük tankerlərin limana daxil olmasını təmin etmək üçün terminala gedən kanalların dibinin dərinləşdirilməsində iştirak edib.
