Azərbaycan, Bakı, 14 aprel / Trend , müxbir E.İsmayılov /
Xəzərin Azərbaycan hissəsində yerləşən "Şahdəniz" dəniz yatağının işlənməsinin birinci mərhələsi çərçivəsində Türkiyəyə sutka ərzində ixrac edilən qazın həcmi təqribən 18 milyon kub metr təşkil edir. Bu barədə neft-qaz sahəsindəki mənbə bildirib. Gürcüstana "Şahdəniz"dən sutka ərzində 1,3-1,4 milyon kub metr qaz ixrac edilir.
Yataqdan hasil edilən qazın qalan hissəsini Azərbaycan əldə edir.
Mənbənin dediyinə əsasən, hazırda "Şahdəniz" yatağında gündəlik qaz hasilatı 21-22 milyon kub metr təşkil edir.
"Şahdəniz" yatağının işlənmsi haqqında müqavilə 1996-cı il iyunun 4-də imzalanıb. Müqavilə iştirakçıları BP (operator) 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz şirkətləridirlər.
Hazırda qaz Cənubi Qafqaz boru kəməri ilə Gürcüstan və Türkiyəyə nəql edilir. Bu il birinci mərhələ çərçivəsində sözügedən yataqdan 9 milyard kub metr qaz hasil etmək planlaşdırılır.
"Şahdəniz"in ikinci mərhələsinin 2014-cü ildə həyata keçirilməsi planlaşırılır. İkinci mərhələ çərçivəsidə hər il 20 milyard kub metr qaz hasil etmək nəzərdə tutulub.
Məqalə müəllifi ilə əlaqə ünvanı: [email protected]
