Azərbaycan, Bakı, 30 may / Trend , müxbir E.İsmayılov /
"Rusiya tərəfi yaxınlarda Azərbaycan, İran və Rusiyanın enerji sistemlərinin sinxronlaşdırılması layihəsi çərçivəsində işlərə başlayacaq", - Azərenerji SC-nin başçısı Etibar Pirverdiyev bildirib.
"Biz öz ərazimizdə bir sıra işlər görmüşük və düşünürəm ki, yaxın zamanda Rusiya tərəfi də razılaşmaya əsasən nəzərdə tutulan işlərə başlayacaq", - Pirverdiyev bildirib.
Bu layihənin realizəsi Azərbaycan, Rusiya və İran arasında qarşılıqlı eletrik enerjisi mübadiləsinə və regionun qalan ölkələrini bu layihəyə qoşmaq imkanı verəcək. Əvvəllər Rusiya və İran arasında əməkdaşlığın tipi haqda danışıqlar aparılıb. Tərəflərdən biri qarşılıqlı elektrik enerjisi satışı, digəri mübadilə məsələsi üzərində dururdu.
Hazırda İranla enerji mübadiləsinin 700 MVt-a qədər artırılması üçün Azərbaycan birgə layihəni realizə edir. Onun başa çatdırılması Naxçıvan Muxtar Respublikasına 150 MVt və ümumilikdə Azərbaycan enerji sisteminə qış dövründə 400 MVt elektrik enerjisi ötürmək imkanı verəcək. Proqram İranın Sunir şirkəti ilə birlikdə realizə edilir və özündə 330 kilovoltluq EÖX - Əli-Bayramlı İES - İmişli, İmişli - Parsabad ikinci xətti, 220 kilovoltluq EÖX - Əli-Bayramlı İES - Salyan, Salyan-Masallı, Masallı-Astara, həmçinin "Salyan" yarımstansiyasının tikintisi və daha dörd yarımstansiyanın genişləndirilməsini nəzərdə tutur. EÖX-nin ümumi uzunluğu 350 km olacaq.
"Azərbaycan və Rusiya arasında enerji mübadiləsi davam edir və bu il onun artırılması gözlənilir", - Pirverdiyev qeyd edib.
Bu ilin birinci rübündə Rusiyadan Azərbaycana 8,5 milyon kilovatt/saat, əks istiqamətdə isə 33 milyon kilovatt/saat elektrik enerjisi tədarük edilib.
Ümumilikdə 2008-ci ildə Rusiyadan Azərbaycana 111,3 milyon kilovatt/saat, əks istiqamətdə isə 335,5 milyon kilovatt/saat elektrik enerjisi tədarük edilib.
Məqalə müəllifi ilə əlaqə ünvanı: [email protected]
